Энэ оны жүдо бөхийн ДАШТ ирэх тавдугаар сарын 19-23-ны өдрүүдэд АНЭУ-ын Абу Даби хотноо зохион байгуулагдах бөгөөд таван тивийн 109 орны 675 шилдэг жүдоч хурд хүч, авхаалж самбаагаа сорино. Тус тэмцээнд манай улсаас 13 жинд 18 жүдоч хүч үзэх гэж байгаагийн ес нь эрэгтэй, ес нь эмэгтэй. Өнгөрсөн оны ДАШТ мөн л энэ сард болж өнгөрсөн билээ. Тэгвэл бид та бүхэнд ДАШТ-д хүч сорих жүдочдыг цувралаар танилцуулахаар боллоо. Энэ өдөр бид эмэгтэйчүүдийн -48 кг-ын жинд барилдах ОУХМ Г.Наранцэцэг, Б.Баасанхүү нарыг танилцуулж байна. 

Энэ жинд дэлхийн аваргын төлөө чансааг тэргүүлэгч Италийн Скутто Ассунта буй. Тэрбээр ДАШТ-ий хоёр хүрэл, Их Дуулга тэмцээний дөрвөн алт, нэг хүрэлтэй. Мөн залуучуудын ДАШТ-ий алт, мөнгөтэй. Өдгөө 22 настай идэр жүдоч энэ удаад алтын төлөөх хамгийн хүчтэй өрсөлдөгч байх нь гарцаагүй. Түүнээс гадна Японы Кога Вакана, Казахстаны Абужакынова Абиба зэрэг мундгууд эгнэж байна. 

ОУХМ Б.Баасанхүү гэж хэн бэ? 

Тэр бол -48 кг-ын жингийн бас нэг ирээдүй билээ. Тэрбээр 2000 онд төрсөн, 24 настай. Хөвсгөл нутгийн охин Б.Баасанхүү жүдо бөхийн Улсын АШТ-д анх удаа түрүүлсэн нь 2022 он.  Тус ондоо Тeль Авиваас хүрэл, Парис болон Анаталийн Их дуулгаас мөнгөн медаль хүртсэн. Мөн 2023 оны дөрөвдүгээр сард болсон Жүдо бөхийн холбооний ээлжит Их дуулга тэмцээн Туркын Анталяа хотод болоход Г.Наранцэцэгийг зооны аваргын төлөө ялж, хоёул хүрэл медалийн тавцанд зогссон билээ. 

Түүнчлэн ойрхондоо тэр хоёр алтан медалийг энгэртээ ихэрлүүлээд буй. Эхнийх нь ААШТ, нөгөөх нь "Душанбегийн Их дуулга 2024" тэмцээн юм. Бэлтгэл жигдэрч, ир ханасан түүнээс Монголын ард түмэн олимп дэлхийн медаль хүлээж байна. 

Тэрбээр "Сүлд" спорт хорооны нэр дээрээс барилддаг. Түүнийг олон улсын спортын шинжээчид Дэлхийн аварга болох өндөр магадлалтай бөхөөр нэрлэсэн удаатай. Тэрбээр Дэлхийн чансааны тавдугаар байрт, 4762 оноотойгоор бичигдэж байна. Одоо болох ДАШТ-нд тэрбээр чансаагаараа гуравт байгаа. 

Сүүлийн үед гаргасан амжилтууд, 

ОУХМ Г.Наранцэцэг гэж хэн бэ? 

Тэр бол -48 кг-ын жингийн залгаж мөн. 2008 онд Н.Түвшинбаяр аваргыг Олимдод түрүүлэхэд бөхийн спортод дурлаж эхэлсэн байдаг.  Архангай аймгийн Ихтамир суманд төрсөн тэрбээр анхандаа Чулуун-Эрдэнэ, Орхонбат, Батжаргал нарын удирдлагад чөлөөт бөхөөр хичээллэжээ. Тухайн үед Ихтамир суманд жүдо бөх хөгжөөгүй байсан гэнэ.

Г.Наранцэцэг бөхөөр анх хичээллэхдээ 24 кг жинтэй байжээ. Гэтэл тэмцээний хамгийн хөнгөн жин 32 кг. Тэмцээнд оролцох гэхээр жин нь хүрдэггүй байж. Тэгээд л аргагүйн эрхэнд бэлтгэлээ өдөр бүр хийнэ, багшаасаа гуйна. Олон кг-ын зөрүүтэй тул бэртэж, гэмтэх вий гээд ч тэр үү, түүнийг өрсөлдүүлдэггүй байсан гэнэ. Г.Наранцэцэг хичээсээр, гуйсаар байгаад багшаараа арайхийж зөвшөөрүүлжээ. Гэтэл багш нь “За, энэ хүүхдийг ялбал тэмцээнд оролцуулъя” гээд түүнийг эрэгтэй тамирчинтай барилдуулжээ. Ганц олдсон боломжийг ашиглан, хичээсээр өрсөлдөгчөө ялсан ч багш нь хэлсэндээ хүрээгүй гэнэ. Уйлсаар гэртээ харьсан нь түүний санаанаас ер гардаггүй гэдэг. Шантарч, урам нь хугараад чөлөөт бөхөөс хоёр жил хөндийрчээ. 

Өдгөө 29 настай тэрбээр Азийн наадмаас алтан медаль хүртсэн анхны самбоч юм. Тодруулбал, 2018 онд Индонез улсад болсон 18 дахь удаагийн Азийн наадмын самбо бөхийн эмэгтэйчүүдийн 48 кг-д Г.Наранцэцэг түрүүлсэн. Улмаар Азийн наадмын дэвжээнээс алтан медаль хүртсэн анхны монгол самбоч болсон түүхтэй. Түүхэн амжилтын эзэн болохдоо тэрбээр аваргын төлөөх барилдаанд Б.Ойдовчимэдийг ялсан байдаг. Г.Наранцэцэг самбо, жүдо бөхөөр давхар хичээллэдэг. Гэхдээ жүдогоор арай илүү түлхүү хичээллэн, амжилтын төлөө зүтгэж яваа. Тэр одоогоор Дэлхийн чансааны 17 дугаар байрт, 3372 оноотойгоор бичигдэж буй.

Сүүлийн үеийн амжилтууд, 

Л.Сайнаа