"Монгол бөхийн өргөөн"-д өчигдөр Залуучуудын байгууллагад үүсэж хөгжсөний 102 жилийн ойд зориулсан улс, аймгийн цолтой 256 бөхийн барилдаан болж, Баянхонгор аймгийн Баянбулаг сумын харьяат, улсын харцага Нацагсүрэнгийн Золбоо түрүүлэв. Тэгвэл бид та бүхэнд түүний тухай сонирхолтой 12 баримтыг хүргэж байна. 

Баримт 1

Нацагсүрэнгийн Золбоо нь Баянхонгор аймгийн Баянбулаг сумын уугуул, Үндэсний бөхийн улсын харцага цолтой. 

Баримт 2

Тэрбээр 1990 оны 12 дугаар сарын 4-нд төрсөн. 

Баримт 3

Чөлөөт барилдааны олон улсын хэмжээний мастер цолтой.

Баримт 4

Тэрбээр Залуучуудын улсын хошой аварга. 2011 оны "Mongolia open" олон улсын тэмцээнээс 96 кг-д алт зүүж, 2012 онд хүрэл медаль хүртсэн. Ази тивийн аварга шалгаруулах тэмцээний 1 мөнгө, 4 хүрэл, Иван Ярыгины нэрэмжит алтан гран пригийн хошой хүрэл, өөрийн орны улсын аваргын алт, мөнгө, хүрэлтэй медальтай.

Баримт 5

Золбоо нь 2008 онд арван найман настайдаа Дорноговь аймгийн Хөвсгөл суманд түрүүлж сумын заан цол хүртсэн. 2011 онд Дархан хотод зохион байгуулагдсан үндэсний бөхийн залуучуудын аварга шалгаруулах барилдааны дөрөвдүгээр байрын шагналтай.

Баримт 6

Аймгийн наадмын дэвжээнд  анх 2013 онд буюу Баянхонгор аймгийн наадамд аймгийн харцага Б.Бат-Амгаланд өвдөг шороодон үзүүрлэж "Аймгийн заан" цол хүртсэн.

Баримт 7

2014 онд Баянхонгор аймгийн наадамд аймгийн арслан Б.Бат-Амгалангаар найм даван түрүүлж "Аймгийн арслан" цол хүртсэн.

Баримт 8

Дараа жил нь 2015 онд Баянхонгор аймгийн наадамд тав давж шөвгөрөн " Нэмэх " чимэг нэмсэн.

Баримт 9

2016 онд Баянхонгор аймгийн наадамд аймгийн харцага Д.Бямбасүрэнгээр найм даван түрүүлж " Хурц " чимэг нэмсэн.

Баримт 10

2017 онд Баянхонгор аймгийн баяр наадамд цэргийн арслан Д.Цэрэнтогтохоор найм даван түрүүлж " Бадрангуй " чимэг нэмсэн бол 2018 оны "Бүх цэргийн баяр наадам"-д тав давж шөвгөрөн " Өсөх " чимэг нэмсэн байдаг. 

Баримт 11

Тэрбээр 2018 онд АХ-ын 97 жилийн ойн баяр наадамд улсын начин С.Батсууриар дөрөв, улсын харцага Б.Бат-Өлзийгөөр тав, цэргийн арслан Д.Цэрэнтогтохоор зургаа давж " Монгол улсын харцага " цолыг хүртсэн.

Баримт 12

Улмаар 2022 онд АХ-ын 100, 101 жилийн ойн баяр наадамд аймгийн арслан Ч.Алтангэрэлээр дөрөв, аймгийн арслан Д.Тогтохжаргалаар тав, аймгийн хурц арслан Ө.Батзулаар зургаа давж чимэг нэмсэн.

Л.Сайнаа