Монгол Улс хавдрын өвчлөл өндөртэй, хавдраас шалтгаалдаг нас баралтын тоогоор дэлхийд дээгүүрт ордог билээ. Үндэсний статистикийн хорооноос гаргасан мэдээллээр 100 мянган хүн амд ногдох хорт хавдрын өвчлөл 2022 онд 206.1, нас баралт 136 байсан нь дэлхийн дунджаас өндөр байгаа юм. Сүүлийн 10 жилд хорт хавдрын тохиолдол тогтмол нэмэгдэж, өнгөрсөн онд хавдрын 6,885 шинэ тохиолдол бүртгэгдсэний дийлэнх нь хожуу шатанд оношлогдсон аж.

Хавдрын хожуу шатанд оношлогдсон өвчтөнүүдэд эрхтэн шилжүүлэн суулгахаас өөр эмчилгээ байдаггүй ч эрхтэн шилжүүлэх мэс засалд орохын тулд хоёр хүртэл жил хүлээх нөхцөл байдал үүсжээ. Өнөөдрийн байдлаар гэхэд л элэг шилжүүлэн суулгах мэс засалд 460, бөөр шилжүүлэн суулгах мэс засалд 550 өвчтөн орохоор хүлээж байна. Хэдийгээр манай улс эрхтэн шилжүүлэн суулгах үндэсний багтай болж, эмч, мэргэжилтнүүдийн чадавх бэхэжсэн ч өөрийн гэсэн байргүй тул өвчтөнүүд удаан хугацаагаар хүлээж, зарим тохиолдолд амь насаа алдах тохиолдол ч гарах эрсдэлтэй тулгараад буй. Тиймээс манай улсад Хавдар судлалын үндэсний төвийн салбар эмнэлэг болон Монгол Улсын анхны эрхтэн шилжүүлэн суулгах төвийг нэн даруй байгуулах шаардлагатай байгааг салбарын сайд онцолсон билээ.

Өдөр өдрөөр хувьсан өөрчлөгдөх амьдралын хэв маягаа зөв хянаж чадахгүйгээс, орчин тойрон эрсдэл ихтэй газар олширсон хот суурин, утаа, орчны бохирдол, хүнсний эрүүл, аюулгүй байдал алдагдсаар байгаа нөхцөл байдал, чанартай хоол хүнс авч хэрэглэж чадахгүй санхүүгийн боломж, архи тамхины хэт их хэрэглээ, хорт зуршлууд гэх мэт хавдрын үй олон шалтгаанууд эргэлдсээр буй энэ цаг үед хүн бүр өөрийн болоод гэр бүлийнхээ эрүүл мэндэд анхаарах нь нэн тэргүүнд сэргийлэх чухал зүйл билээ. Харин нэгэнт өвчилсөн иргэдээ цаг алдалгүй эмчилж, тусламж үйлчилгээ үзүүлэх нь төр засгийн бодлого шийдвэртэй салшгүй холбоотой. Хэдийгээр эмнэлэг барих чухал хэрэгцээ шаардлага үүссэн ч өвчлөлөөс урьдчилан сэргийлэх, эрүүл орчин нөхцөлд аж төрөх боломж бололцоог хангах, эрүүл, аюулгүй амьдрах гадаад хүчин зүйлсийг бүрдүүлэхдээ яг юуг анхаарч ажиллах вэ гэдэг асуудал асуулт хэвээр үлдсээр...