Өнгөрсөн оны 10 дугаар сараас эхлэн бөхөд шимтэгчдийн магнайг тэнийлгэсэн зүйл бол "Үндэсний алтан цом"-ын төлөөх аймгуудын багийн барилдаан байлаа. Монгол улсын 21 аймаг, нийслэлийн есөн дүүрэг, Тува улсын гэсэн нийт 32 багийн хэмжээнд гурван шат зохион байгуулагдсан уг барилдаан өчигдөр дүнгээ гаргаж, шигшээ барилдаанд Архангай аймгийн баг Булган аймгийн багийг илт илүүрхэж, анхны "Алтан цом"-ын эзэд болов. Тэгвэл бид та бүхэнд "Алтан цом"-ын  төлөөх ялалтын давааг багтаа авчирсан, нэг ч уналгүй тав давж, багаа манлайлсан Улсын харцага "ӨНДӨР" О.Мөнх-эрдэнийн тухай сонирхолтой 10 баримтыг хүргэж байна. 

БАРИМТ 1

Тэрбээр 1995 оны гуравдугаар сарын 25-нд Архангай аймгийн Хайрхан суманд төрж өсжээ. 

БАРИМТ 2

Тэрбээр 2016 онд Архангай аймгийн баяр наадамд тав давж шөвгөрөн Аймгийн начин цол хүртэж байв. Үүний дараа жилийн Архангай аймгийн баяр наадамд тав давж шөвгөрөн чимэг нэмсэн.

БАРИМТ 3

2019 онд Аймгийн харцага цол хүртсэн бөгөөд Орхон аймгийн баяр наадамд аймгийн арслан Б.Уртбаяраар найм даван түрүүлсэн юм. Мөн тус онд бүх цэргийн баяр наадамд зургаа давж шөвгөрөн Цэргийн харцага цол хүртсэн.

БАРИМТ 4

О.Мөнх-Эрдэнэ нь "Алдар" спорт хороо, "Бөх Билэгт" дэвжээ, "Молор трейд" ХХК, "Вайт лэйк" ХХК-ийн харьяат бөх юм. 

БАРИМТ 5

Тэрбээр 2020 онд Улсын начин цол хүртсэн бөгөөд Ардын хувьсгалын 99 жилийн ойн баяр наадамд улсын харцага Н.Батзаяагаар дөрөв, улсын аварга С.Мөнхбатаар тав давсан билээ. 

БАРИМТ 6

Түүнийг Монголын ард түмэн "Өндөр" Мөнх-эрдэнэ хэмээн хочилдог. Учир нь түүний биеийн өндөр 198 см ажээ. 

БАРИМТ 7

Тэрбээр МҮБХ-ноос зохион байгуулдаг албан ёсны Улс, аймгийн алдар цолтой бөхчүүдийн барилдаанд анх удаагаа түрүүлсэн өнгөрөгч дөрөвдүгээр сард болсон Архангай аймаг байгуулагдсаны 100 жилийн ойд зориулсан Арын сайхан хангай нутгаас төрөн гарсан Таван аварга-д хүндэтгэл үзүүлэх Улс, аймгийн алдар цолтой 256 бөхийн барилдаан байв. Уг барилдаанд тэрбээр найм даюан түрүүлсэн бол Улсын даян аварга Н.Батсуурь үзүүр булаасан. 

БАРИМТ 8

О.Мөнх-эрдэнэ өнгөрсөн жилийн АХ-ын 100, 101 жилийн ойн баяр наадамд аймгийн хурц арслан Э.Төгөлдөрөөр дөрөв, улсын начин Ц.Сандагдоржоор тав, аймгийн арслан Б.Түмэндэмбэрэлээр зургаа давж " Монгол улсын харцага " цолыг хүртсэн. Тус наадмын түрүү бөх Улсын аварга О.Хангайд амлуулан унасан билээ. 

БАРИМТ 9

Тэрбээр Улсын үнэн зоригт харцага Батсүхийн Зоригтбаатартай шороо идэж өссөн багын найз нь юм. Тэд ижил загварын машин унадаг. Түүнчлэн нэг өдөр аймгийн начин цолыг хүртэж байжээ. Хос сойлготой морьд шиг ижилдэн дассан, хувь заяа нь ижилхэн гэмээр өндөр нам харцагууд нэг оны нэг өдөр төрсөн гэдэг. Тэд Орхон аймгийн баяр наадамд түрүүлж Аймгийн арслан цолын хүртэцгээсэн. 

БАРИМТ 10

Монголын хамгийн сайхан галбиртай, охид хүүхнүүдийн хүслэн болсон бөх гэвэл түүнийг хэлнэ. Учир нь түүнийг крашладаг бүсгүйчүүдийн тоо ӨМӨЗО-ны бөх С.Төмөрбаатарынхаас их юм гэнэ лээ. 

Л.Сайнаа