Батлан хамгаалах салбарт мэргэжлийн ахлагч бэлтгэж эхэлсний 30 жилийн баярт өдөр Зэвсэгт хүчний Агаарын цэргийн харьяа Зэвсэгт хүчний 065 дугаар ангийн холбоо ротын станцын дарга, ахлагч Б.Хулан, тус ротын тасгийн дарга, ахлагч М.Ариунтуяа нар АНУ-ын Агаарын цэргийн Ахлагчийн удирдлагын анхан шатны дамжаанд суралцах эрхээ авч, энэ өдөр эх орноосоо хүлгийн жолоо заллаа.

ЗХЖШ-ын Гадаад хэлний сургалтын төвд амжилттай суралцан шалгуур үзүүлэлтийг хангасан бүрэлдэхүүнийг Агаарын цэргийн штабын дарга бригадын генерал Б.Эрдэнэбат хүлээн авч уулзан цаашдын суралцах их үйлст амжилт хүссэн юм.

Тэрээр Агаарын цэргийн харьяа анги, салбаруудаас анх удаа тэр дундаа эмэгтэй цэргийн алба хаагчид дээрх дамжаанд суралцах болсонд баяртай байгаагаа илэрхийлж, үүрэг хариуцлагаа ухамсарлан сайн суралцаж, залуу ахлагч нарт ялангуяа эмэгтэй ахлагчийн бүрэлдэхүүнд АНУ-д суралцах боломж байдаг гэдгийг үлгэрлэн харуулах ёстойг онцолж байсан юм.