Засгийн газрын ээлжит хуралдаанаас гаргасан зарим шийдвэрийг танилцууллаа. Энэ үеэр Сангийн сайд Б.Жавхлан мэдээлэл өгөв.

Тэрбээр, "Нийт 736 төсөл арга хэмжээг төсвийн хөрөнгөөр үргэлжлүүлж байна. Онцгой анхаарал татсан буюу наймаас дээш жил, мөн хэд хэдэн удаагийн үнийн өсөлтөөр төсөвт суулгасан, өнөөдрийг хүртэл дуусаагүй 25 төсөл арга хэмжээ байгааг яаралтай дуусгах, дахин нягтлах үүрэг бүхий Шадар сайд С.Амарсайханаар ахлуулсан ажлын хэсэг долоо хоногийн хугацаанд ажиллахаар боллоо. 

Гүйцэтгэгч талаас нэгэнт гэрээлж авсан бол зөрчил гаргахгүйгээр төслийг заасан хугацаанд дуусгах шаардлагыг өндөржүүлэх, энэ хугацаанд төрөөс олгож болох дэмжлэг, хөнгөлөлтүүдийг хүнд сурталгүйгээр үзүүлж байх чиглэл өглөө.

Түүнчлэн тендерт оролцох эрхээ хасуулсан 46 компани байна. Мөн 117 аж ахуйн нэгжийг цаашид хар жагсаалтад оруулах санал ирж, хяналт шалгалт хийж байна. Аравдугаар сарын сүүлээр шалгаж дууссанаар хар жагсаалтад оруулах эсэхийг шийднэ" гэв.

Үргэлжлүүлэн сэтгүүлчийн асуултад хариуллаа. 

Удаан жил үргэлжилж байгаа төслүүдийг нэгэнт эхлүүлсэн учир зориулалтынх нь дагуу хурдан хугацаанд дуусгах арга хэмжээг авах хэрэгтэй. Эдгээрийн дотор голдуу спорт заал, цогцолборын барилгууд байна. Үүнд захиалагч талын буруу их. Тухайлбал анхны гаргасан зураг төсөл нь хэд хэдэн удаа өөрчлөгдөж, төсөв нь өөрчлөгдөхөөр гүйцэтгэгч талаас ажил явуулах боломжгүй болсон.

14 дэх жилдээ хэрэгжээгүй төсөл ч байна. Энэ хооронд барилга нь элэгдэлд орсон, захиалагч талаас гурван удаа төсөв нь өөрчлөгдсөн төслүүд байх жишээтэй. Үүнийг өнөөдөр байгуулагдсан ажлын хэсэг нягтална" гэлээ.