НИТХ-ын ээлжит бус XIV хуралдаан үргэлжилж байна. Бумбатын рашааныг орон нутгийн тусгай хамгаалалтын бүсэд авах тухай Нийслэлийн Байгаль орчны газрын дарга Р.Энхтайван танилцуулсан юм.
Тэрбээр “Сонгинохайрхан дүүргийн 24 дүгээр хороо, Толгойтын Баруун салаанд орших Бумбатын рашааны 39.1 га талбайг дүүргийн ИТХ-ын 2015 оны 10/10 тогтоолоор орон нутгийн тусгай хамгаалалтад авч байсан. Харин 2018 оны дүүргийн ИТХ-ын тогтоолоор хилийн цэсийг шинэчлэн тогтоон 44.1 га талбай болгон нэмсэн юм. Нийслэлийн Байгаль орчны газраас 2019 онд Бумбатын булгийг түшиглэн 1.2 метрийн гүнтэй, 10,500 шоо метр эзлэхүүнтэй хиймэл нуур байгуулсан. Мөн “Тэрбум мод” үндэсний хөдөлгөөний хүрээнд 2021-2022 онд 11 мянга гаруй мод тарьснаар 7.7 га газарт ногоон бүс бий болголоо. Мөн орон нутгийн тусгай хамгаалалттай дөрвөн байршилд бичил тохижилт хийгээд байна” гэв.
Бумбатын рашааныг орон нутгийн тусгай хамгаалалтад авах асуудлаар Сонгинохайрхан дүүргийн 24 хорооны 70 гаруй иргэнтэй хэлэлцүүлэг хийхэд 98 хувь нь дэмжсэн аж. Газрыг орон нутгийн тусгай хамгаалалтад авснаар эко системийн ач холбогдол бүхий газрын хамгаалалтыг сайжруулах нөхцөл бүрдэж, эко системийн тэнцвэрт байдлыг хангах боломжтой аж.
Цаашид орон нутгийн тусгай хамгаалалттай газар нутгийг түшиглэн явган аяллын маршрутыг нэмэх, зэрлэг амьтдыг ажиглах мониторинг судалгааны цэгүүдийг байгуулах, тогтвортой санхүүжилтийн механизм бүрдүүлж, эко системийн үйлчилгээнд тулгуурласан хамгаалалтын менежментийг нэвтрүүлэх юм. Мөн нэн ховор амьтан, ургамалд таатай орчин бүрдүүлэх, тархац нутгийг орон нутгийн тусгай хамгаалалтад авах, иргэдийн экологийн боловсролыг дээшлүүлэх, олон улсын сайн туршлагыг судалж, стандарт мөрдүүлэх чиглэлээр ажиллана гэдгийг Нийслэлийн Байгаль орны газраас онцолж байв.
Тусгай хамгаалалттай газар нутгийн тухай хуулиар тус газарт судалгаа шинжилгээний зориулалтаас бусад төрлийн барилга байгууламж барих, үйлдвэрлэлийн зориулалтаар газар ухах, тэсэлгээ хийх, ашигт малтмал хайх, олборлох, гүний худаг гаргах, цооног өрөмдөхийг хориглодог байна.
Нийслэлийн Газар зохион байгуулалтын албаны дарга Г.Батзориг “Бумбатын рашааны 44.1 га талбайн 80 нэгж талбарт газар олголт хийсэн байснаас 76 нэгж талбарыг хүчингүй болгосон. Үлдсэн дөрвөн нэгж талбарт мод үржүүлгийн зориулалтаар үйл ажиллагаа явуулдаг байгууллагууд байгаа тул сонсох ажиллагаа хийж буй. Эдгээрийн байршлыг өөрчлөх, эсвэл газар олголтыг хүчингүй болгох ажлыг зохион байгуулна” хэмээв.
НИТХ-ын төлөөлөгчид орон нутгийн тусгай хамгаалалтад авсан газрын ашиглалт, хамгаалалтад анхаарах, Бумбатын рашааны эхэнд байгаа суурьшлын бүсийг бүрэн цэгцлэх хэрэгтэйг хэлж байлаа.
Ийнхүү НИТХ-ын ээлжит бус XIV хуралдаанаар Сонгинохайрхан дүүргийн 24 дүгээр хороо, Толгойтын Баруун салаанд орших Бумбатын рашааны 44.1 га газрыг байгалийн нөөцийн ангиллаар орон нутгийн тусгай хамгаалалтад авлаа.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
