МҮОХ-ны дэргэдэх “Тамирчин нөхөн сэргээх төв”-ийн таван давхар байр Э.Бадар-Ууганы хамаарал бүхий “Өөжин мед” эмнэлгийн оромж болоод багагүй хугацааг үдэж буй.

Монголын тамирчдын өмч гэсэн ч болох нөхөн сэргээх төвийг хувьдаа авч, “халаасалсан” түүнд хариуцлага тооцох нь бүү хэл, бадар барьж гүйх нь холгүй явсаар өдийг хүрчээ.

МҮОХ-ны ерөнхийлөгч асан Д.Загдсүрэн, тус хорооны Захиргааны албаны дарга асан, хуулийн зөвлөх Б.Наранцэцэг нар МҮОХ-ны өмчид байсан Тамирчин нөхөн сэргээх сувиллыг "ХХК" болгон өөрчилж, нэг хүний өмчид шилжүүлээд зогсохгүй, цааш нь ашиг олох зорилгоор худалдан борлуулсан нь одоогийн "Өөжин мед" эмнэлгийн байр болж хувирсан талаар тухайн үед хэвлэл мэдээллийн хэрэгслүүдээр баримтуудыг нь дэлгэн бичиж байв. Атал хөдөлмөрийн баатар абугай асуудлаас нэрээ цэвэрхэн авч гарах санаатайгаар барахгүй, “Хулгай хийж биш, худалдаж авсан” хэмээн ярьж байжээ. Уснаас хуурай гарахын үлгэр болдоггүй л юм бол Э.Бадар-Ууган “цэврийн нэр” зүүж амьдрах боломжгүй юм.

Өдгөө “Өөжин мед” үр шилжүүлэн суулгах төв "Нөхөн үржихүйн эмчилгээ, үйлчилгээний цогцолбор" эмнэлгийг байгуулахаар Хан-Уул дүүргийн 15 дугаар хороонд байрлах Цэнгэлдэх хотхонтой залгуулан барихаар газар, шорооны ажлаа хийж байна. Гэвч оршин суугчдын эсэргүүцэлтэй тулж, тараа таниулж явна. Энэ тухайд иргэдийн байр суурийг хүргэж байна.

Оршин суугч НЭГ: Өндөр барилгуудын хоорондын зай ямар байх талаар стандарт бий. Гэтэл шахаад барилгын ажлаа эхлүүлчихсэн. Арав хүрэхгүй метрт барилга байхад тулгаад 14-16 давхар барилга барих зөвшөөрөл олгодог ямар ашиг сонирхол байна вэ. Мөн энэ газрын өмнөх зориулалтыг харахад, Олимпын хорооны нөхөн сэргээх төв байгуулах газар байсан чинь "Өөжин мед"-ийн "Нөхөн үржихүйн цогцолбор" гэсэн хоёр блок барилгыг 2025 онд ашиглалтад оруулахаар төлөвлөгөө гаргасан байна. Шахуу барилга барихаар хөрсний нуралт үүсвэл яах вэ. 

Олимпын аварга гээд ард түмэн их хайртай байдаг. Гэтэл Олимпын хорооны ЕБНД нь ингээд газраас нь ашиглаад яваад байж болох уу? Өмнө нь "Өөжин мед"-тэй холбоотой асуудал үүсэж л байсан. Албан тушаал, ашиг сонирхлын зөрчил байж мэдэх учраас Э.Бадар-Ууганыг АТГ-т өгнө гэж бодож байгаа. 

Оршин суугч ХОЁР: Энэ газрыг спортын чиглэлийн барилга барих зориулалтынх нь дагуу ашиглаач гэсэн хүсэлтийг гаргаад байж байна. Мөн орон сууцны дундах барилгажаагүй талбайд барилга байгууламж барихад иргэд, хуулийн этгээдүүдээс саналыг нь авна гэсэн журмыг зөрчиж байна. Нэг ч оршин суугчаас санал аваагүй. Бид хорооны засаг даргад хүсэлт өгч, өргөдөл гаргаад явж байгаа гэсэн юм. 

Нэр алдарт хүрмэгцээ тамирчдын хүртэх ёстой бүхний магнайд залагдаж, орой дээр нь сандайлж суудаг эрх ямбатан Э.Бадар-Ууганаар зогсохгүй.

Ард түмний хайр хүндлэл дээр эрхэлж, буруу замаар будаа тээх нь бий. Цэнгэлийн манлай болмогц хамгаа барьж гүйсээр Н.Түвшинбаярыг авир араншингаа дарж чадахгүй болтол нь оодруулсан. Харин Э.Бадар-Ууган тамирчдын нөхөн сэргээх төвийг өөрийн болгож, өнөөдөр жишим ч үгүй хувийн бизнесээ цэцэглүүлж, бас болоогүй иргэдийн эрх ашгийг хөндөж явна. 

М.Дэвээжаргал