Соёлын сэргэлт 2023” аян Төвийн бүсийн Дархан-Уул аймгийн Орхон суманд 2023.09.26-ны өдөр Соёлын төвд нээлтээ хийлээ. Энэ үеэр Монголын үндэсний кино урлагийн зөвлөлийн гишүүн Б.Пүрэвдорж “Кино урлагаар үндэсний соёлын дархлааг сэргээх нь” илтгэлээ танилцуулав. Аян үндсэн гурван хэсгээс бүрдэж буй.
Үзэсгэлэн
Дархан хотод бүтээгдсэн монгол киноны гэрэл зургийн үзэсгэлэн, Киноны шинжлэх ухааны 31 нэр төрлийн 40 боть номын үзэсгэлэнгүүдээ дэлгэжээ. Мөн монгол киноны тухай асуулт, хариулт бүхий мэдлэг олгох үйл ажиллагаа болон Дархан-Уул Аймгийн Музей "Баярын малгай" боловсролын хөтөлбөрийг тус тус зохион байгуулжээ.
Кино үзвэр
Орхон сумын цэцэрлэгийн насны хүүхдүүдэд “Ами Тами-Хөгжилтэй аялал” хүүхэлдэйн кино, ЕБС-ийн сурагчид, хүүхэд залууст “Зүрхэнд гэрэлтэнэ”, “Дурсаж яваарай” зэрэг уран сайхны киног үзүүлж сонирхууллаа.
Урлагийн тоглолт
Тус сумын Соёлын төвд Залуучууд театр-ын уран бүтээлчид, бүжигчин Г.Ууганбаатар - Төрийн Соёрхолт зууны манлай бүжиг дэглээч С.Сүхбаатарын “Хултай хотон” бүжиг, бүжигчин Г.Энхзул, С.Мөнхжаргал, С.Дэлгэрмаа нар “Бүсгүйн намжир” бүжиг, Орхон сумын соёлын төвийн дуу хөгжмийн багш А.Нандинцэцэг “Хунгийн дуу” зэрэг уран бүтээлүүдээр урлагийн үзүүлбэрээ толилуулжээ.
Мөн үдшийн цэнгүүн, нийтийн бүжиг, тоглолт зохион байгуулж Орхон сумын иргэдэд соёлын үйлчилгээ үзүүлэн ажилласан байна. “Соёлын сэргэлт-2023” аяныг Монголын Үндэсний Кино Урлагийн зөвлөл болон Дархан-Уул аймгийн Соёл урлагийн газар хамтран 2023 оны 09 дүгээр сарын 27-ны өдөр Шарын гол суманд үргэлжлүүлэн зохион байгуулж ажиллах юм.
