"Нүүрсний" гэх хэргийн нотлох баримтын шинжлэх судлах сонсголын эхний үе шат эхэллээ.  Өнөөдрийн сонсголоор “Тавантолгой” ХК-ийн нүүрс олборлолт, борлуулалт, тээвэрлэлт, экспортын үйл ажиллагаа болон бусад бараа, ажил, үйлчилгээ, худалдан авалтын үйл ажиллагааны талаар мэдээлэл авч байна. Энэ үеэр Х.Сугир үг хэлэв. 

Тэрбээр, "Нүүрсний хулгайн асуудлаар хэлэлцүүлэгт орж байгаадаа харамсаж байна. Өмнөговь аймаг бол асар их уул уурхайтай. Улсын төсвийн 40 хувийг бүрдүүлдэг Өмнөговь аймгийн хөгжлийг ярьж байвал сайхан байлаа. Төрийн хулгайг арилгах зорилгоор хэлэлцүүлгийг хийж байгаа нь цаг үеэ олсон асуудал гэж ойлгож байна.

2009 оны нэгдүгээр сарын 14,16-нд л 49 хувийн 20 гаруй хувийг эзэмшдэг Д.Бат-Эрдэнийг ТУЗ-ын гишүүнээр сонгож, ТУЗ-ын дарга болгосноос л 51 хувийн тал бол давуу эрхээ бүрэн алдсан. Үүнээс болж хамаг луйвар булхай гарсан гэж ойлгож байна. 

Би бол 2000-2012 онд Өмнөговь аймгийн ИТХ-ын төлөөлөгчөөр 4 удаа сонгогдож ажилласан. 2016 оноос ИТХ-ын даргаар 4 жил ажилласан.

2018 онд Улаанбаатарт ч, Өмнөговь аймагт ч Тавантолгой ХК-д орох орлогыг 16 хувиар бууруулж, гүйцэтгэх удирдлага болон ТУЗ-ын даргаар ажиллаж байсан хүмүүс хуйвилдаж, орон нутгийн Тавантолгойг хохироож байсан байна гэдэг мэдээллийг би олон удаа хийж байсан. Орон нутгийн орлого, улсад төлөх татварыг нэмэгдүүлэх чиглэлд онцгой анхаарч ажиллаж байсан.

Харин Д.Бат-Эрдэнэ Тавантолгой ХК-д орох орлогыг олон аргаар бууруулж ирсэн. 14 сая тонн нүүрсний 60-аас илүү хувийг Д.Бат-Эрдэнийн байгуулсан Тавантолгой транс компани худалдаж авсан байна гэдгийг 2012 онд мэргэжлийн хяналтын байгууллагаас ч гаргаж ирсэн.

Д.Бат-Эрдэнэд Тавантолгой ХК-ийн орлогыг нэмэгдүүлж, хувьцаа эзэмшигчдийн ашгийг нэмэгдүүлэх хүсэл сонирхол байхгүй. Өөрсдийн хувийн компанийн ашиг орлогыг нэмэгдүүлэх гэж л ажилласан гэдэг нь их тодорхой.

2016 оноос хойш орлогыг нэмэгдүүлэхийн тулд бид анхаарч ажилласан" гэв. 

М.Дэвээ