Замын хөдөлгөөний түгжрэл, ачааллыг бууруулах зорилгоор 2023 оны арванхоёрдугаар сарын 18-наас 2024 оны нэгдүгээр сарын 31-нийг дуустал автомашиныг улсын дугаарын тэгш, сондгойгоор замын хөдөлгөөнд оролцуулахаар шийдвэрлэсэн билээ. Гэнэтийн уг шийдвэрээ тэр шөнийн цагаар дуулгаж, маргааш нь олон нийт хараалаар тургих шиг болсон. Гэвч өнөөдөр бид дасчихсан, мартчихсан яваа. 

Дугаарын хязгаарлалт ажлын өдрүүдэд 08:00-20:00 цагийн хооронд үргэлжлэх бөгөөд амралтын өдөр үйлчлэхгүй байгааг та бид мэддэг болсон. Замын түгжрэл багасаж, ажил сургуульдаа амжиж хүрэхийн сайхныг бид мэдэрлээ. Гэвч хотын даргын хэлсэн хугацаа өнөөдрөөр дуусгавар болж, маргаашаас эхлэн бид түгжрэл дундаа түгжүүлэх нь ээ. Явган яваад нь гайгүй, явдаг унаатайд нь гайтай шийдвэр юмсанж. 

Эндээс бид манай хотын автомашины даац хоёр, гурав дахин хэтэрсэн гэдгийг ойлголоо. Тэн хагас нь хөдөлгөөнд оролцож байхад л түгжирсээр байгааг гайхахгүйн учир энэ.

Хуучин цагт адгийн ядуу айл хүртэл чөдрийн ганц морьтой байлаа. Энэ л сэтгэхүй өнөөдөртэй золгож, айл бүр өр зээл тавиад ч хамаагүй хөл дүүжлэх унаатай болохыг хүсдэг болжээ. Нөхцөл, шалгуур хөнгөнтэй автомашины зээлүүд, зээл олгогчид олширсон өнөө цагт түгжрэл буурах нь хэтэрхий, үл биелэх мөрөөдөл билээ.

Замбараагүй жолооны үнэмлэх олголтууд цахимжилтын нөлөөгөөр цэгцэрч, нэг үеэ бодвол чанартай жолооч нар хүрд мушгиж яваа. Гэвч хэдхэн жилийн өмнө байсан "Жолооны үнэмлэх гаргана" гэх зарлалын бүтээгдэхүүнүүд хажуу машинаа шүргэж, халтиргаанд гулсаж явсаар туршлага сууж буй биз ээ. Тэр хирээр жолооч нар машинтайгаа зам дээр мэндэлсээр байсны горыг бид зуу нугалж эдлэв. 

Сүүлийн өдрүүдэд дээрх шийдвэрийг үргэлжлүүлэн сунгах тухай санал асуулга, яриа хөөрөө гарсан. Тодруулбал, Энэ сарын 31-нд эл шийдвэрийн хэрэгжих хугацаа дуусгавар болох ч дахин эсэх талаар Нийслэлээс иргэдийн дунд санал асуулга явуулж байна. Санал асуулгад одоогоор 3000 орчим хүн саналаа өгөөд байгаагийн 60 хувь нь дугаарын хязгаарлалтыг үргэлжлүүлэхийг дэмжихгүй гэдэгт санал өгчээ. Эндээс харахад маргааш бид түгжрэлтэйгээ "халуун дотноор уулзалдах" магадлал өндөр буй.

Хэрэв үргэлжлүүлбэл таатай гэж бодох минь унаа үгүйн зовлон биз ээ. Гэвч хөхөө өвлийн хүйтэнд өөрийн унаагаа зогсоолд гацаачхаад хэнбугай нь л автобусны буудал дээр даарч зогсохыг хүсэх билээ дээ. Бас хэн л түгжирч, хамаг цагаа зам дээр үхүүлэхийг хүсэх вэ дээ. Энэ хоёрын дунд буй Нямбаатар дарга гэвч, хэн хэнд нь ээлгүй, гуравдагчид ашигтай шийдвэр битгий гаргаасай... 

Л.Сайнаа