ХVII жарны "Хилэнт эх" хэмээх модон луу жилийн сар шинийн барилдаан өргөн дэлгэр болж, бөх сонирхогчдыг цэнгүүллээ. Сар шинийн барилдаан хэзээнээсээ Монголын ард түмний хүлээлтийг үүрч, бахархал, өв уламжлалыг түүчээлсээр ирсэн.
Улсын баяр наадмын дараа нэрлэгдэх уг томоохон наадамд бөхчүүд тухайн жилийнхээ өнгийг үзэх гэж олноор зодоглодог. Уг барилдаанд түрүүлсэн бөх Улсын наадамд цолоо ахиулж, цаашлаад түрүүлдэг гэх ойлголт ч олны дунд бий.
Энэ удаагийн барилдаанд 256 бөх хоёр өдөр үнэн хүчийг үзсэнээс 2022 оны наадмын түрүү бөх Улсын аварга О.Хангай хөлс гаргалгүй найм давж, олныг бишрүүллээ. Түүний хувьд намрын нээлтийн барилдаанаас хойших тав дахь түрүүгээ хүртэж, бэлтгэл, форм сайтай байгаагаа баталлаа. Бөхийн өргөөнд хамгийн олон түрүүлсэн Ч.Санжаадамба аваргын амжилтыг эвдээд буй тэрбээр энэ улиралд,
- ТВ9 телевизийн 20 жилийн ойд зориулсан барилдаан
- Олон улсын хүний эрхийн өдөрт зориулсан, Жанрайсаг бурхны хишиг барилдаан
- Ховд аймгийн Буянт сумын харьяат, улсын заан Дасрангийн Мягмарын нэрэмжит барилдаан
- Жем Интернэшнл ХХК-ийн 25 жилийн ойд зориулсан, Улсын харцага цолонд хүндэтгэл үзүүлэх барилдаан
- Хилэнт эх хэмээх модон луу жилийн сар шинийн баярт зориулсан барилдаанд түрүүлээд байна.
Луу жил бөхчүүдэд ээлтэй, тэр ч бүү хэл луу жилд сайн бөх төрдөг гэх яриа олны дунд бий. Волейболын спортоос хожуу Үндэсний бөхөд хөл тавьсан О.Хангай 2014 оны Ялгуусан хэмээх модон морин жилийн сар шинийн баярт зориулсан барилдаанд Аймгийн арслан цолтой барилдаж, олон шилдгүүдийг хаян үзүүрлэсэн цагаас Монголын ард түмний хайртай бөх болсон. Тэр жил тэрбээр Улсын гарди Д.Рагчаад унаж байлаа. Үүнээс гурван жилийн ар дээр 2017 оны Алтан унжлагат хэмээх гал тахиа жилийн сар шинийн баярт зориулсан барилдаанд мөн л үзүүр булааж, олны хүндлэлийг хүлээж байв. Тухайн жил Ч.Санжаадамба аваргын эд үе, дийлдэшгүй цаг хугацаа байсан учир яалт ч үгүй түрүүлсэн биз ээ.
Сар шинийн барилдаан анхлан зохион байгуулагдсан 1963 оноос хойш өнөөг хүртэл зургаан Луу жил тохиожээ.
1964 оны луу жилийн барилдаан - Улсын дархан аварга Ж.Мөнхбат
1976 оны луу жилийн барилдаан - Улсын дархан аварга Ж.Мөнхбат
1988 оны луу жилийн барилдаан - Улсын дархан аварга Б.Бат-Эрдэнэ
2000 оны луу жилийн барилдаан - Улсын дархан аварга Б.Бат-Эрдэнэ
2012 оны луу жилийн барилдаан - Улсын аварга С.Мөнхбат
2024 оны луу жилийн барилдаан - Улсын аварга О.Хангай нар тус тус түрүүлэв.
Тэгэхээр Луу жилийн барилдаанд дандаа аваргууд түрүүлдэг учир гэхэд болно. Аварга тодроо дархан аварга цолтой бөхчүүд тус бүр хоёр удаа түрүүлсэн нь гайхам амжилт билээ.
Одоо ир нь харьж яваа ч 10 жилийн өмнө бөхийн өргөөг үзэгчээр дүүргэдэг байсан Улсын дархан аварга Н.Батсуурь, аварга Г.Эрхэмбаяр, С.Мөнхбат, Ч.Санжаадамба, П.Бүрэнтөгс, арслан Ц.Содномдорж, Р.Пүрэвдагва, Э.Оюунболд зэрэг хүчтэнүүдийн эрлэг байсан О.Хангайн бөхийн замнал ид үедээ гялалзаж байна.
Ховдын цэнхэр хязгаараас хотол бүхнээр алдаршсан түүний амжилт Луу жил даяар цуурайлах учир бий биз ээ. Ямартай ч 10 жилийн өмнө үзүүр булааж байсан Аймгийн арслан О.Хангай санасандаа хүрч, сайрвайснаа атгалаа.
Л.Сайнаа
