Сүхбаатар аймгийн Засаг дарга М.Идэрбат, ИТХ-ын дарга Д.Хосбаяр нарыг АТГ-аас шалгаж байна хэмээн бид өмнө МЭДЭЭЛСЭН. Тэгвэл энэ асуудлаар АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэн  мэдээлэл өглөө.  

Тэрбээр "АТГ-ын мөрдөн шалгах хэлтэс Сүхбаатар аймгийн удирдлага буюу Сүхбаатар аймгийн Засаг дарга, тус аймгийн ИТХ-ын дарга болон бусад холбогдох албан тушаалтнуудыг 2023 оноос эхлэн мөрдөн шалгах ажиллагааг явуулж эхлүүлсэн. Шалгалтын хүрээнд дараах нөхцөл байдлууд тогтоогдож байгаа юм. Тодруулбал:

Сүхбаатар аймгийн Засаг дарга нь нэр бүхий УИХ-ын гишүүний үеэл дүүгийн эзэмшлийн Сүхбаатар аймгийн Баруун-Урт сумын гуравдугаар багийн нутаг дэвсгэрт байрлалтай 6,700 метр квадрат, мөн 1,359 метр квадрат хэмжээтэй хоёр байрлал бүхий газрын зориулалтыг Газрын тухай хууль болон Газар эзэмших, ашиглах эрхийн гэрчилгээ олгох журмыг зөрчиж зориулалтыг нь өөрчилж, бусдад давуу байдал бий болгосон байж болзошгүй.

Сүхбаатар аймгийн Засаг дарга нь өөрийн хадам дүүгийн Сүхбаатар аймгийн Баруун-Урт сумын хоёрдугаар багийн нутаг дэвсгэрт байрлах 2,635 метр квадрат хэмжээтэй авто угаалга, гражийн зориулалттай газрын төлбөрөө төлөөгүй байхад Газрын тухай хуулийг зөрчиж, бусдад шилжүүлж давуу байдал бий болгосон байж болзошгүй. 

Мөн нэр бүхий УИХ-ын гишүүний эзэмшлийн Сүхбаатар аймгийн Баруун-Урт сумын нутаг дэвсгэрт байрлах 3,211 метр квадрат хэмжээтэй газрыг эзэмших эрхийг нь Газрын тухай хууль, холбогдох журмыг зөрчиж, түүний хамаарал бүхий этгээдэд шилжүүлж, давуу байдал бий болгосон байж болзошгүй.

Түүнчлэн архитектур төлөвлөлтийн даалгаваргүй, батлагдсан зураг төсөлгүй, барилгын ажил эхлүүлэх зөвшөөрөлгүй нэр бүхий компанийн захиралтай шинэ суурьшлын бүс байгуулах, түлхүүр гардуулах нөхцөлтэй ажил гүйцэтгэх гэрээ байгуулж, зөвшөөрөлгүй барилгын ажил эхлүүлэх зөвшөөрлийг өгч 1.4 тэрбум төгрөгийн санхүүжилт авах нөхцөлийг бүрдүүлсний хариуд нийслэлийн Баянзүрх дүүргийн нутаг дэвсгэрт байрлах гурван өрөө үл хөдлөх хөрөнгийг хахуульд авсан байж болзошгүй нөхцөл байдал тогтоогдож байна.

Иймд тус аймгийн Засаг дарга М.Идэрбатыг яллагдагчаар татсан. Мөн сэжигтнээр татан баривчилж, мөрдөн шалгаж байна. 

Сүхбаатар аймгийн ИТХ-ын дарга нь өөрийн эрх мэдэл, албан тушаалын байдлаа урвуулан ашиглаж, тус аймгийн Баруун-Урт сумаас зохион байгуулсан тендерт өөрийн хамаарал бүхий этгээдийн компанийг шалгаруулж, гэрээний гүйцэтгэл, техникийн тодорхойлолт болон тендерийн баримт бичигт заасан шалгуур үзүүлэлт шаардлагыг хангаагүй өөрийн эзэмшлийн хөрөнгийг нийлүүлж, өөртөө болон бусдад эдийн засгийн давуу байдал бий болгосон байж болзошгүй нөхцөл байдал тогтоогдож байна. 

Мөн Сүхбаатар аймгийн төр, хувийн хэвшлийн зөвлөлийн даргын албан тушаалын байдал, эрх нөлөөг  урвуулан ашиглаж, БНХАУ-д аялах 29 хүний аяллын зардлыг аймгийн нутаг дэвсгэрт, ашигт малтмалын олборлолтын үйл ажиллагаа эрхэлж байгаа нэр бүхий компаниар төлөөлүүлж, өөрт болон аймгийн төр захиргааны байгууллагын албан тушаалтнуудад эдийн засгийн давуу байдал бий болгосон байж болзошгүй тул яллагдагчаар татагдсан" гэлээ. 

Түүнчлэн мөрдөн шалгах ажиллагааны явцад аймгийн удирдах эрх бүхий албан тушаалтнууд гэмт хэргийн замаар олсон хөрөнгөө нуун далдлах зорилгоор өөрийн хамаарал бүхий иргэдийн банкны данс, картыг ашигладаг. Мөн ахуйн хэрэглээний хоол хүнс, бараа, баяр ёслолын үеийн бэлэг сэлтийг албаны эрх нөлөөгөө ашиглаж, хүнсний дэлгүүр, үйлчилгээний төвүүдээс төлбөрийг төлөхгүйгээр авдаг. Улмаар уг төлбөрийг хууль бус орлогоор нөхөж төлдөг, өөрийн албаны эрх нөлөөг бэхжүүлэх зорилгоор өөртөө болон бусдад давуу байдал бий болгосон байж болзошгүй нөхцөл байдлууд тогтоогдож байгаа. 

Мөн аймгийн удирдах албан тушаалтан нь 1989 оны төгсөгчдийн клуб нэртэй ТББ-д гишүүнчлэлээр хамтран байдаг бусад этгээдүүдийн ААН-үүдийг Сүхбаатар аймгаас зарлаж байгаа тендерт шалгаруулах үйл явцад хууль бусаар нөлөөлсөн байж болзошгүй. 

Хан-Уул дүүрэгт байрлах хаус хорооллууд дээр нуугдмал хөрөнгө байж болзошгүй. Үндэслэлгүй хөрөнгөжсөн нөхцөл байдал тогтоогдоод байна" гэв. 

М.Жаргал