Нийслэлд ойрын өдрүүдэд гурван гол замыг хааж засварын ажил хийх талаар өмнө нь мэдээллэсэн.

Тодруулбал, нийслэлийн Баянзүрх дүүрэг 7, 17, 38 дугаар хорооны нутаг дэвсгэр “Харуул алтай” хотхон орчмоос “Да Хүрээ” гудамж хүртэлх авто замд засвар, шинэчлэлтийн ажил хийх тул тавдугаар сарын 18-ны Бямба гарагийн 22:00 цагаас тавдугаар сарын 21-ний Мягмар гарагийн 06:00 цагийн хооронд хаана.

Сүхбаатар болон Чингэлтэй дүүргийн нутаг дэвсгэр, СУИС-ийн уулзварын зүүн талаас Хүнсний 4 дүгээр дэлгүүрийн уулзварын зүүн тал хүртэлх авто замыг тавдугаар сарын 21-ний Мягмар гарагийн 04:00 цагаас тавдугаар сарын 22-ны Лхагва гарагийн 06:00 цагийн хооронд хааж, шинэчилнэ.

Тус замыг асфальт бетоноор хучих бөгөөд хашлага өндөрлөж зорчих хэсгийн түвшинд тааруулах, худгийн таг өндөрлөх, тэмдэг тэмдэглэгээний ажлыг хийнэ. Иймд иргэд, жолооч нарыг бусад замыг сонгон хөдөлгөөнд оролцохыг ТЦА-наас анхааруулсан.

Түүнчлэн нийслэлийн Баянзүрх дүүргийн 42 дугаар хороо, “Нарантуул” захын уулзвараас “Өгөөмөр” зах хүртэлх авто замыг тавдугаар сарын 20-ны Даваа гарагийн 23:00 цагаас тавдугаар сарын 23-ны Пүрэв гарагийн 06:00 цагийн хооронд хааж, хэсэгчлэн засварлаж, шинэчилнэ. Тус замыг асфальт бетоноор хучах юм.