Zarig.mn сайтын эрхлэгч Н.Өнөрцэцэгт холбогдох хэргийн шүүх хурал болж буйтай холбоотойгоор сэтгүүлч Ч.Лодойсамбуу дараах байр сууриа илэрхийллээ. 

Тэрбээр "Сэтгүүлчээр ажиллаж болохгүй гэсэн шийдвэр гаргадаг, гэрт нь хорьдог, хорих газар аваачаад хоёр сар байлгадаг, хэрэг нь шийдэгдэггүй, байгаад л байдаг. Энэ эрүүдэн шүүж байгаа явдалд л миний зэвүү, дургүй зэрэг хүрч байна. Энэ бол Өнөрцэцэгээр дамжуулан Лодойсамбууг болон сэтгүүлчдийг айлгаж байна гэсэн үг. Өнөөх дарангуйлал ирсний дохио. Манай Засгийн газар системийн авлигатай тэмцэнэ гээд байгаа. Гэхдээ системийн дарангуйлал угсарчихсан гэдгийг бүгдээрээ хараад байж байна. Системээрээ дарангуйлж байна шүү дээ.

Миний таамаглалаар сонгууль өнгөртөл шүүхийн шийдвэр гарахгүй байх. Сонгууль өнгөрсний дараа алх цохино, алх цохиод шоронд оруулна. Дараа нь Д.Мөнх-Эрдэнээр захиа бичүүлсэн шиг ээ Н.Өнөрцэцэгээр ч бас бичүүлж, номхруулах гэж байна л гэж харж байна. Ийм байдлаар явбал сүүлдээ бид сэтгүүлзүйгүй болох нь байна.

Мэдээ мэдээллийн араас явах боломжгүй болчихож. Татгалзах аргагүй мөнгө санал болгож байна, түүнээс нь татгалзвал ажиллуулахгүй бариад хорьдог болчихож. Эрүүдэн шүүлтээ зогсоо. Ерөнхий сайд эрх мэдэл гуйгаад байдаг шүү дээ. Ерөнхий сайдад шидэт дохиураас бусад нь бүгд байгаа. Үүгээр системийн дарангуйлал угсарч байна. Хуучин улстөрчидтэй тэмцэж байна гэсэн нэрээр дарангуйлал угсарчихлаа шүү дээ. Бид зарчмаа барих ёстой, Хуулиа мөрдөх учиртай. Зөрчсөн бол хариуцлагаа хүлээх ёстой. Гэхдээ шийтгэхдээ ч хуулийн дагуу явах ёстой.

Улаан цайм эрүүдэн шүүгээд байж болохгүй шүү дээ. Монгол Улс сэтгүүлзүйтэй байх боломжгүй болчихож байгаа юм биш үү. Би сурвалжилгаар явдаггүй болохоор гэнэтийн алдаа харагддаггүй байх. Ганц, хоёр удаа л дуудагдаж байсан. Асар олон дарамт ирнэ. Мөнгөний дарамт ирнэ. Үүний өөдөөс зогсох, өөрийнхөөрөө ажиллах эрх чөлөөг хайх гээд их дарамтан дунд явдаг. 

Сэтгүүлчийг эрүүдэн шүүж байна. Энд миний нэгдэж байгаа зүйл нь сэтгүүлзүй. Түүнийг тасдаж унагаагаад, яргалж үзүүлж байна гэж бодож байна. Хамгийн залуу Ерөнхий сайд, хамгийн их хүчээрээ ийм л зүйл хийж байна" гэв. 

М.Жаргал