Африкийн зэрлэг заанууд бие биендээ хүмүүс шиг нэр өгч, нэгнээ нэрээр нь дууддаг болохыг саяхны судалгаа баталжээ. Далайн гахайнууд л гэхэд нэгнээ дуудахдаа дуу авиа ашигладаг бол тотьнууд өөр өөр дуу авиа гаргадаг нь хуучны судалгаа юм.

Харин Кени дэх Африк заанууд амьтдын бие биенээ таних, дуудах тал дээр өөр ойлголтыг төрүүлж эхэлсэн нь энэ. Даваа гарагт "Nature Ecology and Evolution" сэтгүүлд нийтлэгдсэн судалгаанд дурдсанаар, эдгээр заанууд нэг төрлийн авиагаар биш шал ондоо төрлийн авиануудаар нэгнээ ялган таньж, дууддаг болох нь тогтоогдсон байна. 

Зааны дуудлагын хамгийн түгээмэл төрөл бол шуугиант авиа бөгөөд үүнээс гурван дэд ангилал байдаг. Холбоо барих чимээ нь хол эсвэл харагдахгүй байгаа өөр зааныг дууддаг. Өөр заан уг авиаг дуулсан даруй мэндчилгээний дуу авиаг ашигладаг. Ээж заан тугалаа дуудахдаа мөн өөр дуу авиаг ашигладаг ажээ.

Судлаачид 1986-2022 оны хооронд Амбосели байгалийн цогцолборт газар болон Самбуру, Баффало Спрингсийн үндэсний нөөц газарт судалгаа явуулж эмэгчин, тугалын харилцаанаас 469 өөр янзын дуудлагын бичлэгийг баримтжуулсан гэнэ. 

Судлаачид дуудлагын зорилго нь хэн байхаас хамаарч дуудлагын акустик бүтэц өөр өөр байдгийг олж мэдсэн.

Л.Сайнаа