БАРИМТ 1
2000 оны гуравдугаар сарын 20-нд мэндэлжээ.
БАРИМТ 2
"Бөх Билэгт" дэвжээ, "Алдар" спорт хороо, ЗХ-034 анги, Залуу Ноёд ХХК-ийн бөх.
БАРИМТ 3
Биеийн өндөр 186 см, биеийн жин 130 кг.
БАРИМТ 4
XXI зууны ууган наадамд Агваансамдангийн Сүхбат анхны түрүүгээ хүртэж, арслан цол авсан нь 2000 он юм. Тэр жилийн наадмаар А.Сүхбатыг түрүүлэхийг бэлгэдэж, бас наадмын өмнө төрсөн нуган үрээ бөх болохыг ерөөж бөхийн үнэнч дэмжигч Сүхбаатар гуай хүүдээ Сүхбат хэмээн нэр хайрлажээ.
БАРИМТ 5
Бөхийн мэргэжилтнүүдийн ч харааг булаасан С.Сүхбат хүү 17 настайдаа төрсөн нутаг Хашаат сумынхаа наадмын түрүүг авсан.
БАРИМТ 6
Тухайн жилийн чөлөөт бөхийн өсвөр үеийнхний улсын аварга шалгаруулах тэмцээний 85 кг-ын жинд Э.Батмагнай начинтай түрүү булаалдан мөнгөн медаль хүртэн гэртээ харив.
БАРИМТ 7
Их спортын элдэв мэхийг “Аварга” дээд сургуульд дөрвөн жил суралцахдаа олж мэдсэн ч сумын заан цолноос хэтрээгүй сургуулиа дүүргэсэн юм.
БАРИМТ 8
Түүний амжилтын торгон ир таарч том бөх болсон нь 2022 он. Сумын заан цолтнуудын барилдаанд 10 давсанаар Архангай нутгийн аварга, арслангуудын харааг булааж, араас нь залгах бөх гэдгээ ахин нотолсон нь Бүх цэргийн наадам бөгөөд начин цолтой нутаг буцах нь даанч хайран байлаа.
БАРИМТ 9
Нутгийн ах болох цэргийн арслан Л.Отгонбаатар нь түүнийг цэргийн начин цолонд хүргэсэн. Цэргийн начин болох замдаа аймгийн арслан Л.Нямбаяр, М.Адъяахүү, тухайн жилийн улсын начин Б.Мижидсүрэн, Ө.Батзул нарыг давсан.
БАРИМТ 10
Үүнээс нэг сарын зайтай Архангай аймгийн баяр наадамд улсын цолтой гурав, аймгийн арслан цолтой зургаан бөх зодоглосон чансаатай 128 бөхийн барилдаанд амжилтанд өлссөн С.Сүхбат босоо байж арслан цол хүртсэн.
БАРИМТ 11
Улсын наадамд зодоглосон бол начин цол авахаар тийм сайн байлаа. Аймгийн арслан цолтой ердөө 16 хоног болохдоо Дундговь аймгийн түүхт 80 жилийн ойн түрүүг хүртэж, хурц арслан чимэг авсан юм.
БАРИМТ 12
Түүний бие хувирсан гэж жигтэйхэн. Алдарт бөх Б.Бат-Эрдэнийн цойлон гарч ирж буй үеийн дүр зураг гэлтэй. Жилийн дотор танигдахгүй хувирсан бөх юм даг.
БАРИМТ 13
Алтан цомын барилдаанд даян аварга Н.Батсуурийг төвөггүй унагаж хэр бөх гэдгээ анх харуулж байв. Хэн нь аварга гэлтэй тийм нэг илүүгээ харуулсан барилдааныг мартах аргагүй. Одоо л нэг бяр нь ханаж, бэлтгэл нь жигдэрсэн, биеэр ч, бяраар ч том бөх болсон Хашаатын Сүхбат хүү төрийн наадамдаа зургаа давж, Улсын харцага цолтон болсон нь 2023 он юм аа.
БАРИМТ 14
2023 оны баяр наадмын түрүү бөх М.Бадарч ахаас нь допинг илэрч тэр одоо Улсын заан гэж цоллуухаар болсон. Түүнийг ард түмэн төрийн наадмын түрүү хүртэнэ гэж итгэл тавьдаг.
БАРИМТ 15
Итгэлийг нь батлах шиг тэр Даншиг наадамд түрүүлэв.
БАРИМТ 16
Өнөө жилийн Улсын баяр наадамд тэр өнгөтэй байсан ч гурвын даваанд зүлгэн дээр халтирч унасан.
БАРИМТ 17
С.Сүхбат хүү аймгийн цолтойдоо 2023 оны Дашчойлин хийдийн нэрэмжит, аймаг цэргийн цолтой бөхчүүдийн барилдаанд үзүүр булаасан. Уг барилдаанд Аймгийн хурц арслан Н.Өсөхбаяр түрүүлсэн юм.
БАРИМТ 18
Харин улсын цолтон болсныхоо дараа 2024 онд Архангай аймгийн Өлзийт сумын 100 жилийн ойд зориулсан, тус сумаас төрөн гарсан улсын цолтнуудын нэрэмжит барилдаанд үзүүрлэсэн. Уг барилдаанд Улсын арслан Ц.Бямба-Отгон гарди цолтой түрүүлж байв.
Сэтгэгдэл (5)