СУИС-ын Дүрслэх урлагийн сургуулийн төгсөгч Н.Хатанбүүвэй, Д.Азжаргал нарын хамтарсан "The Light" судалбар зургийн үзэсгэлэн маргааш буюу 10 дугаар сарын 29-нд Монголын урчуудын эвлэлийн байр М Арт галерейд нээлтээ хийх гэж байна. 

Үзэсгэлэн ирэх 11 дүгээр сарын 08-нийг хүртэл өдөр бүр 11-17 цагийн хооронд олны хүртээл болно. Та бүхэн ороод гараарай.  Тэгвэл бид танд уг үзэсгэлэнг зорин очих 5 шалтгааныг хүргэж байна. 

Шалтгаан 1 - Жинхэнэ анд нөхрөө олох 

Н.Хатанбүүвэй, Д.Азжаргал нар уг хамтарсан үзэсгэлэнгээрээ ганцаардсан хэн бүхэнд анд нөхрийг нь таниулна. "Ганцаараа биш авч бид ганцаарддаг" нь гарцаагүй үнэн билээ. Хэдийгээр та найз нөхөдтэйгөө наргиж, цэнгээд олуулаал сайхан байж болох юм. Гэвч гэртээ харих замдаа, өөр олон шалтгаанаар та ганцаараа байдаг шүү дээ. Орой бүрийгээр гэюүрэн алхаж явахад магад таны анзаардаггүй зүйлс танд хань болдог гэвэл итгэх үү. Орцны бүдэг гэрэл, шатах дөхсөн шонгийн гэрэл, ааш муутай хөршийн тань амбаарын гэрэл ч таны хань гэдгийг та үзэсгэлгээс ойлгож болох юм. 

Шалтгаан 2 - Үнэгүй сэтгэл зүйн зөвлөгөө

Урлаг гэдэг хамгийн сайн сэтгэл засалч байж чаддаг. Урлагаас хүн өөр ертөнцийн хаалгыг татаж, өөрийн мөн чанар, бусдын шидэт дотоод оршихуйг нээх боломжтой. Бас мэдрэмжээ хөглөх боломж ч байхыг үгүйсгэхгүй. Магад эл үзэсгэлэн танд юуг ч өгөхгүй байж болно. Ядаж л та нүдээ баясгаад гараарай.

Шалтгаан 3 - Амьдрахуйдаа хөрөнгө оруулалт хий

Судалбар зураг гэдэг нь аливаа уран бүтээл хийхийн тулд гол ба туслах дүрүүд болон уран бүтээлд орох дүр дүрслэлүүдийг хэсэгчлэн судалж зурсныг хэлнэ. Уран бүтээлчид юмс үзэгдэл, амьдрал, байгалийн мөн чанарыг танин мэдэх, зурах ур чадвараа сайжруулахын тулд судалбар зургийг байнга хийдэг. Уран бүтээлийн эх дүрүүдийн дагуу зохиомж байрлалыг сонгон боловсруулахын тулд эрэл хайлт хийж тодорхой хон, байгаль, юмс үзэгдлийг судалж зурна. 

Амьдрал тэр чигтээ судалгаа, судалбар, туршилт байж мэднэ. Судалгаанд тань уг үзэсгэлэн нэмрээ өгнө. 

Шалтгаан 4 - Танилын хүрээгээ тэлэх боломжтой 

Урлаг бүхэн гоё хүрээлэлтэй. Та үзэсгэлэнд ирснээр шинэ найзтай болж, танилын хүрээгээ таатайхан тэлээд аваарай.

Шалтгаан 5 - Харж явдаг хүнээ болзоонд урих сайхан боломж

Хэрэв та уйт дурлалын шалаанд суучаад, гутруухан яваа бол харж явдаг хүнээ зориг гарган болзоонд урьж, хамтдаа уг үзэсгэлэнд зочлоорой. Магад та хоёр мэдрэмж хоршиж, хайр бүтээхийг хэн байг гэх вэ дээ.

Л.Баяр