Улс төрийн намын тухай хууль /Шинэчилсэн найруулга/-ийг дагаж мөрдөх журмын тухай хуульд өөрчлөлт оруулах тухай хуулийн төсөл /Засгийн газар 2024.11.22-ны өдөр өргөн мэдүүлсэн, хэлэлцэх эсэх/ асуудлаар Төрийн байгуулалтын байнгын хороо хуралдаж байна. 

УИХ-ын гишүүн Б.Пүрэвдорж "2024 оны сонгуулиар бүрдсэн парламент 126 гишүүнтэй болж, Хамтарсан Засгийн газар байгуулах шийдэлд хүрсэн. Ард түмний сонголтын дагуу эрх баригч нь эрх баригчаа, сөрөг хүчин нь сөрөг хүчнээ хийгээд хамтарсан Засгийн газарт орохгүй байх тухай хэвлэлийн хурлыг хийгээд эсэргүүцээд явж байсан. Гэвч 14 том төслийг хөдөлгөх, 300 гаруй дэд төслийг хэрэгжүүлж, монголынхоо хөгжилд дэвшлийг урагшлуулах, хоёр нам хоёр талдаа гарчихаад нэгнийхээ том төслийг улдан унагаадаг байсныг шийдвэрлэх боломжийг үйл ажиллагааны хөтөлбөрт тусгасан заалтуудаас харсан.

Жалгаар нэг хөрөнгө оруулалт тавихгүйгээр 38 төсөл арга хэмжээг санхүүжүүлэхээр орж ирсэн нь мөрийн хөтөлбөрт үнэнч байж, том төслийг урагш хөдөлгөх эрмэлзэл байгаа нь харагдсан. Үүний дагуу эхний төслөө явуулахаар Цөмийн энергийн тухай хуулийг 97 хувийн саналаар дэмжүүлэн өөрчлөлт оруулсан. 

Улс төрийн намын тухай хуулийн хэрэгжих хугацааг тодорхой хугацаагаар хойшлуулах нь зүйтэй. Тэгэхгүй бол жижиг намууд шууд хурлаа хийх хязгаарлагдмал. Гурван нам л асуудлаа шийдээд, бүртгүүлэхээр нөхцөл байдалтай байгаа. Олон намын системтэйн хувьд бусад намын хүсэлтийг харгалзан үзэх хэрэгтэй гэж үзэж байгаа. Гэхдээ 2027 оны наймдугаар сарын 1 гэдэг бол хэтэрсэн хугацаа. Манай намаас санал авахгүйгээр шууд ингэж шийдэх нь буруу гэж үзэж байна. Энэ хуулийг наашлуулах хэрэгтэй. Нам тогтвортой байх нь маш чухал. Нам тогтвортой байвал Засаг тогтвортой байна. Засаг тогтвортой байвал том төслүүдийг урагшлуулах боломжийг нээнэ. 2026 оны нэгдүгээр сарын 1-ний өдрөөс давуулахгүй байхад анхаарч ажиллана гэж найдаж байна. Хэт хойш тавьбал намуудын дотоод уур амьсгалыг эвгүй байдалд аваачна" гэлээ.