Өнөөдөр Ерөнхийлөгч асан Ц.Элбэгдорж, Ерөнхийлөгчийн тамгын газрын дарга асан П.Цагаан нарыг баривчлах тогтоолыг хүчингүй болгож шийдвэрлэсэн. Энэ асуудлаар Ерөнхий сайд Л.Оюун-Эрдэнээс тодрууллаа.

Тэрбээр, “Одоогийн байдлаар хүчингүй болгосон Шүүхийн шийдвэрийг цаасан хэлбэрээр аваагүй байна. Шүүхтэй холбоотой асуудал болохгүй байна гэдгийг би удаа дараа илэрхийлж байсан. Харамсалтай нь, гүйцэтгэх засаглал шүүх засаглалын асуудалд хөндлөнгөөс оролцоод байна гэдэг агуулгатай шүүмжлэл яваад байдаг. Гэхдээ ард иргэдийн хувьд шүүхийн байгаа байдлыг харж байна.

Ерөнхийлөгч асан Ц.Элбэгдорж болон түүний хамаарал бүхий ойрын этгээдүүдэд манай шүүх ерөөсөө үйлчилдэггүй. Эрдэнэтийн 49 хувийн асуудал хэдэн ч удаа Дээд шүүх рүү очиж, хэдэн ч удаа Анхан шатны шүүх рүү буцав аа. Миний мэдэж байгаагаар 10 гаруй жил болж байна. Миний ингэж шүүмжилж байгаа нь зөв үү, буруу юу? ард иргэд дүгнэлтээ хийнэ биз. 

Энэ бүхний нэгдүгээр шалтгаан бол Гашуунсухайт- Ганц мод боомтын хэлцэлтэй холбоотой.  Хэлцлийг хийхдээ гурав дахь талын төлөөллийг оролцуулахгүй байхаар гэрээ хийж, УИХ-аар эхний баримт бичиг батлагдсан.Ц.Элбэгдоржийн сонирхол бол Тавантолгойг авах л байсан. Энэ бол нууц биш.

2013 онд Засгийн газрын төлөөллүүд  болох  Х.Ганболд, Батцэнгэл, Энхтүвшин БНХАУ-д очиж БНХАУ-д Монголын тал Тавантолгойг өгье гэдэг санал тавьсан байдаг. Энэ португалууд бүгд байгаа. Ингээд 2014 онд яагаад хоёр улсын Засгийн газар хоорондоо шууд гэрээ хийж болохгүй байгаа юм бэ? гэж асуухад заавал манайх тодорхой ААН-үүдийг хувь эзэмшүүлж оруулна. 51 хувьд нь Монголын ААН-д орно, гэхдээ Тавантолгойн хувьд "0". БНХАУ-ын тал 49 хувийг өгнө гэдэг хэлцэл дээр гарын үсэг зурсан. Мөн төмөр замыг /49,17,17,17/ гэдэг хувиар дөрөв хуваах гэрээнд гарын үсэг зурсан.

2014 оны наймдугаар сарын 21-23 ны хооронд Ерөнхийлөгч асан Ц.Элбэгдорж холбогдох байгууллагуудтай гарын үсэг зурсан. Ингээд баримт бичгээ устгасан. Би сая БНХАУ-ын Ерөнхий сайд, Чайна энержи компанитай уулзах үеэрээ тэр баримт бичгийг сураглаж олж, авч ирсэн. Би УИХ-ын гишүүдэд үзүүлсэн, холбогдох байнгын хорооны дарга зэрэгт өгсөн. Эцэст нь үнэнд гүйцэгдээд эсэргүүцэл байхгүйгээр УИХ-ын тогтоол батлагдсан. 

Жагсаалыг П.Цагаан, түүний хүү болон Дотоодын цэргийн командлагч Р.Чингис, түүний дүү Р.Саруул нар санхүүжүүлж байгаа. Ерөнхийлөгч асан Ц.Элбэгдоржийн 2014 онд гадны нөхөдтэй тохирсон хэлцэл үнэнд гүйцэгдэж байна. Тиймээс одоо ирж олон нийтийн толгойг эргүүлэх гэж байгаа. Ц.Элбэгдоржийн үед томилогдсон шүүгч нар эзэндээ үйлчилж байна. Авлигал, ордуудтай холбоотой асуудлыг шүүх 10 жил барилаа.

Хоёр дахь нь Үндэсний баялагийн сантай холбоотой асуудал. Иргэдийн хувийг хүчингүй болгох гээд Үндсэн хуулийн цэцэд хандах гэж байгаа юм. Тиймээс Үндэсний баялагийн сангийн тухай хуулийг нүдний цөцгий мэт хамгаалах хэрэгтэй” гэв.