Цаг уур орчны шинжилгээний газраас 10 хоногийн урьдчилсан мэдээг танилцууллаа. Ойрын өдрүүдэд цаг агаар тогтуун байсан бол 24-нөөс ихэнх нутгаар эрс хүйтэрч, цас орж, цасан шуурга шуурах төлөвтэй байна. Тодруулбал, нэгдүгээр сарын 24-нд нутгийн баруун хагаст, 25-нд нутгийн зүүн хагаст цас орж, цасан шуурга шуурна. Улаанбаатарт 24-25-нд цас орж, цасаар шуурах бөгөөд бусад өдрүүдэд хотод цаг агаар тогтуун байна.

Нэгдүгээр сарын сүүлийн долоо хоногт нийт нутгаар хүйтрэх бөгөөд 22-нд Монгол-Алтайн уулархаг нутгаар, 23-нд баруун аймгуудын ихэнх нутгаар, 24-нд баруун болон говийн аймгуудын нутгийн зарим газар, төвийн аймгуудын ихэнх нутгаар, 25-нд төв болон зүүн аймгуудын ихэнх нутаг, говийн аймгуудын нутгийн зарим газар, 26-нд нутгийн зүүн өмнөд хэсгээр, 27-нд Халх голын сав газраар цас орж, цасан шуурга шуурахыг анхаарууллаа.

Дээрх хугацаанд салхи ихэнх нутгаар секундэд 5-10 метр, 22, 23-нд Алтайн уулархаг нутгаар, 24, 25-нд нутгийн зарим газраар секундэд 16-18 метр хүрч ширүүснэ. Тиймээс хол газар зорчих, малд явахтай сэрэмжтэй байхыг ЦУОШГ-аас анхааруулж байна.

Мөн орон нутагт зорчихдоо зам товчлох нэрийдлээр гол, мөрөн дээгүүр зорчихгүй байхыг зөвлөлөө. Учир нь ихэнх гол мөрний мөсний зузаан тогтвортой нэмэгдэж байгаа ч өнгөрсөн оны мөн үеийнхээс 5-45 см бага зарим голуудад харз халиа тошин гүйж, мөс нимгэрсэн байна.