Нийслэлийн Багануур дүүргийн I хорооны нутаг дэвсгэрт “Багануур” цахилгаан түгээх дэд станцыг түшиглэн 50 МВт хүчин чадалтай батарей хуримтлуурын станцыг байгуулж, өнгөрсөн оны арванхоёрдугаар сарын 5-ны өдрөөс төвийн системд эрчим хүч нийлүүлж эхэлсэн. Тус станцын үйл ажиллагааны талаар Ерөнхий инженер А.Бямбажаргалтай ярилцлаа.

-Багануур дүүрэгт 50 МВт хүчин чадалтай батарей хуримтлуурын станц 2024 оны арванхоёрдугаар сарын 5-ны өдрөөс төвийн системд эрчим хүчээ нийлүүлж эхэлсэн. Өнөөдрийн байдлаар батарей хуримтлуурын станцын үйл ажиллагаа хэрхэн явагдаж байна вэ?

-Нийслэл Улаанбаатар хотыг 2024-2025 онд эрчим хүчээр тасралтгүй, найдвартай хангах өвөлжилтийн бэлтгэл ажлын хүрээнд манай батарей хуримтлуурын станц Багануур дүүрэгт баригдсан. 2024 оны есдүгээр сарын 15-ны өдөр бүтээн байгуулалт эхэлж байсан. Энэхүү станцыг барих захиалгыг нийслэлийн Засаг даргын Тамгын газраас өгч, гүйцэтгэгчээр “Энивишн энержи”, туслан гүйцэтгэгчээр “Мон хорус интернэйшнл” ХХК ажилласан. Өнгөрсөн оны арваннэгдүгээр сарын 29-нд техникийн комисс ажиллаж, 30-нд анх хүчдэл залган, арванхоёрдугаар сарын 5-ны өдрөөс эхлэн Монгол Улсын хэмжээнд 50 МВт эрчим хүчийг нийлүүлж байна. 2025 оны нэгдүгээр сарын 15-ныг хүртэл төвийн системд 7.566.000 кВт.цаг эрчим хүч нийлүүлж, төвийн бүс тэр дундаа Улаанбаатар хотын эрчим хүчний оргил ачааллын үед онцгой хувь нэмэр оруулж байна. Жил ирэх тусам нэмэгдэж байгаа эрчим хүчний дутагдалтай байдлыг богино хугацаанд шийдвэрлэх, цаашид сэргээгдэх эрчим хүчний нөөцийг бий болгох чиглэлд нийслэлийн удирдлагуудын зүгээс оновчтой шийдвэрийг гаргаж хэрэгжүүлж чадсанд баяртай байна.

-Батарей хуримтлуурын станц нь нүүрсээр ажилладаг станцаас онцлогтой. Ногоон эрчим хүч үйлдвэрлэдэг гэж байгаа. Энэ талаар тайлбарлаж өгнө үү?

 -Нүүрсээр ажилладаг станц 24/7 асаалттай байдаг. Гэхдээ эрчим хүч хэрэглэгчдийн хувьд өдрийн турш өндөр ачаалалтай байдаггүй, шөнийн цагт хэрэглээний түвшин эрс багасдаг. Хэрэглээ багатай шөнийн цагт үйлдвэрлэгдсэн, хэрэглээгүй эрчим хүчийг Багануурын батарей хуримтлуурын станцад хуримтлуулан хадгалаад, өдрийн хамгийн оргил ачааллын үед буюу 17-22 цагийн хооронд төвийн системд буцаан нийлүүлэх тохируулгын системтэй байдгаараа онцлогтой. Мөн Батарей хуримтлуурын станц ашиглалтад орсноор төвийн бүсийн эрчим хүчний системийн давтамж тохируулга хийх, өвлийн оргил ачааллыг хөнгөвчлөх буюу системийн үйл ажиллагаанд гарах чадлын дутагдлыг байгаль орчинд ээлтэй ногоон эрчим хүчний эх үүсвэрээр хангах зэрэг олон талын ач холбогдолтой. Бусад төрлийн буюу дулааны, усан зэрэг цахилгаан станцыг барихад олон жилийн хугацаа шаарддаг бол батарей хуримтлуурын станцыг барьж байгуулах, ашиглалтад оруулахад хамгийн бага хугацаа зарцуулдаг нь дутагдалтай байгаа эрчим хүчний хэрэглээ, чадлын дутагдлыг богино хугацаанд нөхөх боломжтой байдгаараа давуу тал гэж ойлгож болно.

-Монгол орны эрс тэс уур амьсгал, хүйтний улиралд батарей хуримтлуурын станц хэр тохиромжтой вэ?

-Манайд байрлуулсан батарей банк болон инвертор бүхий трансформаторын байгууламж нь өөр дээрээ цахилгаан халаагуур болон хөргөлтийн автомат тохируулга бүхий системтэй. Тиймээс өвлийн ид хүйтэнд 2-24 хэм хүртэл халааж, зуны хэт халуунд хөргүүрийн систем нь ажилладаг учраас эрс тэс уур амьсгалтай манай оронд ямар ч асуудалгүй ажиллана. Мөн манайд суурилуулсан батарейнуудын цэнэг хуримтлуулах хурднаас гадна засвар, үйлчилгээг тогтмол хугацаанд хийснээр батарей станц 20-иос дээш жил ажиллах бүрэн боломжтой.

-Станцын боловсон хүчний талаар сонирхуулбал?

 -Манай станц нь Багануур дүүрэгт байгуулагдаж, олон ажлын байрыг бий болгож, мэргэжлийн инженер, техникийн ажилчдыг дүүргээсээ ажиллуулж байгаа. Тиймээс залуучууд дүүрэг, орон нутгаасаа холдохгүйгээр мэргэжлийн ажлаа хийж, амьдрах нөхцөлийг бүрдүүлээд байна. Одоо монгол инженерүүд маань энэ станцын үйл ажиллагааг удирддаг.