Дулааны Гуравдугаар Цахилгаан Станц ТӨХК-аас 5 гаруй тэрбум төгрөгийн тендер зарлажээ.  Тодруулбал, Зуух №13 их засварыг  5,016,367,966 (таван тэрбум арван зургаан сая гурван зуун жаран долоон мянга есөн зуун жаран зургаа) төгрөгөөр хийх аж. Төсвийг өөрийн хөрөнгөөс гаргаж буй аж. 

Дулааны III цахилгаан станцын тоног төхөөрөмж хуучирч, 14.6 тэрбум төгрөгийн алдагдалтай, төсөв мөнгөгүйн улмаас урсгал засвараа ч бүрэн хийж чадахгүй, хэсэгчлэн засварлаж ирсэн талаар оны өмнө мэдээлж байв. Тодруулбал 2023-2024 оны өвлийн ачаалалын үед ДЦС бэлтгэл тоноглолгүй, үндсэн тоноглолууд 120 хоног тасралтгүй ажилласан байна. Үүнээс үүдэн эрсдэл нэмэгдсэн гэж байлаа. Тус станцын Ерөнхий инженер Н.Чимэддорж "Бид урсгал засварыг хийхгүйгээр өвлийн ачаалалд оролцож байгаа. 2024-2025 онд бас л энэ байдал үргэлжилж байна. Төвийн эрчим систем 14мВт, Улаанбаатарын төвд 31 хувь цахилгаан дулаангүй болно. Гэхдээ бид тодорхой хэмжээнд бэлтгэлээ хангаад байна. Өнөөдөр 220 тонн уур үйлдвэрлэдэг уурын зуухыг 13.6 тэрбумаар засдаг ч бид 5.9 тэрбумаар хэсэгчлэн засварлаад явж байна. Одоогоор өвлийн бэлтгэл 98 хувьтай байгаа нь өндөр хувь юм шиг боловч хөрөнгө мөнгө хасагдсан. 

Станцын үндсэн тоноглол болох зуухнаас гардаг үнсийг нойтон аргаар буюу шингэрүүлсэн байдлаар зөөж тээвэрлэдэг. Энэ ажлыг 2 жилийн өмнөөс эхлүүлчихсэн байх ёстой. Бид өөрсдийн хөрөнгөөр бүгдийг шийдвэрлэх боломжгүй. 

Станцын үйл ажиллагаа өвлийн үед зогсвол хот хөлдөж эхэлнэ. Орон сууц, сургууль, банк эмнэлэг зэргийн эрчим хүч тасарна. Одоо бол ашиглалтад орохоор хүлээгдэж буй байрууд руу ч дулаан нийлүүлж чадахгүй байдалтай байна" гэж байсан юм.