Хүнс, хөдөө аж ахуй, хөнгөн үйлдвэрийн сайд Жадамбын Энхбаяр Дархан-Уул аймгийн Орхон сумын удирдлагууд, ИТХ-ын төлөөлөгчдийг хүлээн авч уулзлаа.

Тус сум нь хуучин жимс, ногооны сангийн аж ахуйн суурин дээр байгуулагдсан бөгөөд энэ онцлогт тулгуурлан Монгол Улсын Засгийн газрын бүсчилсэн хөгжлийн бодлогын хүрээнд Орхон сумыг нарийн ногоо, жимс жимсгэний загвар сум болгон хөгжүүлэх бодлогыг сайд Ж.Энхбаяр танилцуулсан юм.

Орхон суманд 2025 онд улсын төсвийн хөрөнгөөр жимс, жимсгэнийн плантаци, ногооны талбайд ойн зурвас байгуулах ажил төлөвлөж буйгаа танилцуулав. Сумын удирдлагууд Шарын голын услалтын системийн толгойн барилга хэсэгт хөв цөөрөм барих ажлын зураг, төсвийг шинээр боловсруулсан талаараа мэдээлэл өглөө.

Сайд Ж.Энхбаяр Шарын голын услалтын системийн хөв цөөрөм байгуулах ажлыг олон улсын төсөл, хөтөлбөрт хамруулж хэрэгжүүлэх чиглэл өгч, уг ажлыг бодлогоор дэмжин ажиллахаа илэрхийллээ гэж ХХААХҮЯ-наас мэдээллээ.