Армен, Азербайжаны албаныхан пүрэв гарагт хоёр улс Зөвлөлт улс задарсны дараагаар хоёр орны хооронд дөчин жил үргэлжилсэн мөргөлдөөнийг зогсоох энхийн гэрээ байгуулахаар тохиролцсон гэж мэдэгдэв. Хөрш орнууд 120 мянга орчим армян үндэстэн амьдардаг Кавказын нурууны салан тусгаарласан Уулын Карабахын төлөө олон арван жил мөргөлдсөн юм.

Энэ бүс нутаг нь олон улсад Азербайжаны нэг хэсэг гэж тооцогддог ч олон арван жилийн турш Арменийн салан тусгаарлагчдын хяналтад байсан билээ. Хоёр улсын энхийн үйл явцад ахиц гарсныг онцолж, Арменийн Гадаад хэргийн яам Энх тайвны гэрээнд гарын үсэг зурахад бэлэн байна гэж мэдэгдэв.

Гэрээний төслийн "шийдвэрлэгдээгүй хоёр зүйл"-ийн талаарх Азербайжаны саналыг Армени хүлээж авлаа гэж Арменийн ГХЯ-ны дэлгэрэнгүй мэдэгдэлд дурджээ. “Хоёр зүйлийн нэг нь хилийн дагуу гуравдагч орны цэргийн хүчийг оруулахгүй байх тухай асуудал юм. Нөгөө нь олон улсын байгууллагаас гаргасан нэхэмжлэлээ харилцан эргүүлэн татах, бие биенийхээ эсрэг арга хэмжээ авахгүй байх амлалттай холбоотой” гэж Арменийн Ерөнхий сайд Никол Пашинян пүрэв гарагт сэтгүүлчдэд мэдэгдэв.

Энхийн хэлэлцээ амжилттай болсныг Азербайжан баталлаа. "Азербайжан, Арменийн хооронд энх тайвны тухай, улс хоорондын харилцаа тогтоох тухай хэлэлцээрийн төслийн талаарх хэлэлцээр дууссаныг бид сэтгэл хангалуун тэмдэглэж байна" гэж Азербайжаны Гадаад хэргийн яам мэдэгдэв.

Гэсэн хэдий ч саад бэрхшээлүүд хэвээр байна. Армен улс үндсэн хуулиараа Азербайжаны бүрэн эрх, нутаг дэвсгэрийн бүрэн бүтэн байдлын эсрэг нэхэмжлэлийг арилгах ёстой бөгөөд энхийн гэрээнд гарын үсэг зурах урьдчилсан нөхцөлийг Азербайжаны тал мэдэгдээд байна. "Бид хоёр орны харилцааг хэвийн болгох үйл явцтай холбоотой эдгээр болон бусад асуудлаар хоёр талын яриа хэлэлцээг үргэлжлүүлэхэд бэлэн байна" гэж мэдэгдэлд дурджээ.

Л.Баяр