Монгол Улсын Соёлын гавьяат зүтгэлтэн, эрдэмтэн зохиолч Дүгэржавын Маамын мэндэлсний 90 жилийн ой энэ онд тохиож буй. Энэхүү үйл явдлыг тохиолдуулан “Дарьгангын туурвил: Дүгэржавын Маам” эрдэм шинжилгээний хурлыг зохион байгуулна. Тус эрдэм шинжилгээний хурлыг Монгол Улсын Гадаад харилцааны яам, СУИС, Сүхбаатар аймгийн Түвшинширээ сумын ЗДТГ-аас хамтран зохион байгуулж байна. Хурал дөрөвдүгээр сарын 3-ны өдрийн 10:00 цагаас Гадаад харилцааны яамны “Зөвшилцөл танхим-д болох юм.

Д.Маам нь 1935 оны хоёрдугаар сарын 26-нд буюу хөхөгчин гахай жил Сүхбаатар аймгийн Түвшинширээ сумын нутаг Бүдүүн овооны Завсрын бууц хэмээх газар төржээ.

Анхны зохиол нь “Мөнгөн өвөл” шүлэг юм. Тэрбээр “Сүүлчийн захидал” найраглал /1959 он/, “Хөгшин тэнүүлч” /1962 он/ зэрэг найраглал болон “Түмэн газрын замд” яруу найргийн номоо 1976 онд хэвлүүлж, “Өндөр Сүхээ” шилдэг өгүүллэг /1981 он/, “Сарнай төрөх учир” /1969 он/, “Цагийн салхи” /1991 он/,  “Газар шороо” роман /1977, 1981, 1982, 1989 он/, “Гишгэх газаргүй хөл” памфлет роман /1979 он/ зэрэг хүүрнэл зохиол, “Мартах эрхгүй” /1980 он/, “Цөвүүн цагийн Богд” /1989 он/, “Мөнх тэнгэрийн хүчин дор” кино /1994 он/ зэрэг кино зохиол бичсэн бөгөөд “Мандухай сэцэн хатан” киноны редактор /1990 он/-оор ажиллажээ. Д.Маам зохиол туурвихаас гадна орчуулга, эрдэм шинжилгэний судалгаа хийж өгүүлэл бичдэг байсан нь А.С Пушкиний “Руслан Людмила хоёр” /1965 он/, Лермонтовын “Банди”, “Шулам” зэрэг зохиолыг эх хэлнээ хөрвүүлжээ. Мөн тэрбээр “Магнаг цэнхэр дэлхий”, “Дунгаамаа” зэрэг монголчуудын дуулах дуртай дууны үгсийг туурвисан Монголын орчин үеийн утга зохиолын гол төлөөлөгчдийн нэг билээ.