Кардиналууд удахгүй Микеланджелогийн Сикстин сүмд цугларч саяхан өөд болсон Пап лам Францисийн залгамжлагчийг сонгох болно. Дараагийн пап ламыг Католик сүмийн хамгийн ахмад зүтгэлтнүүд болох Кардиналын зөвлөл сонгох бөгөөд тэд ойрын хэдэн өдөр Ром руу ирэх сурагтай.

Зөвлөлийн нэр нь "түлхүүртэй" гэсэн утгыг илэрхийлдэг "cum clave" гэх латин үгнээс гаралтай бөгөөд пап ламыг сонгох хаалттай үйл явцыг илэрхийлдэг. Дэлхийн 90 гаруй оронд 250 гаруй кардинал байдаг ч ердөө 135 орчим нь сонгогчийн үүрэг гүйцэтгэнэ. Өөрөөр хэлбэл 80-аас дээш насныхныг уг сонгуульд оролцуулдаггүй аж.

Сүүлийн 10 жилийн хугацаанд 110 орчим кардинал сонгогчийг Фрэнцис тодруулсан нь сүмийн талаарх түүний үзэл бодол ямар чигт байсныг илтгэж байгаа юм. Кардиналууд Ромд пап ламыг нас барснаас хойш 15-20 хоногийн дотор цуглах ёстой гэнэ. Тэд Сикстин сүм дэх Микеланджелогийн таазны дор цугларч, хэлэлцдэг жаягтай.

Санал өгсөн кардиналууд болон цөөн хэдэн албан тушаалтнууд, эмч нараас бусад бүх хүмүүст уг хурлын үүд хаалга хаалттай байдаг. Кардиналууд энэ үеэр туйлын нууцлалтай байхаа тангараглаж, сонгуулийн явцад гадаад ертөнцтэй харилцаагаа бүрэн тасалдаг. Тэдний гар утсыг хурааж, сонин, телевиз, захидал, мессеж зэргийг огт зөвшөөрдөггүй. Чуулганы өмнө болон хурлын үеэр сонсох төхөөрөмж байгаа эсэхийг нэгжлэг хийж шалгадаг хатуу ёстой ажээ.

Кардиналууд Ромын Пап лам Францисийн сүүлийн 12 жил амьдарч байсан Сикстин сүмийн ойролцоо байрлах Гэгээн Мартагийн байшин гэх тусгайлан буудалд унтаж, хооллоно. Хурал цуглааны баяраар эхэлж, дараа нь хэлэлцүүлэг, санал хураалт эхэлдэг. Нэр дэвшигч гуравны хоёрын олонхийн санал авах хүртэл санал хураалтыг өдөр бүр "өглөө, үдээс хойш" авахаар хуульчилсан. Долоон санал хураалтын дараа нэг өдрийн завсарлага, залбирал үйлдэнэ. Түүхэн дэх хамгийн урт пап лам сонгох хурал нь 1922 онд болсон бөгөөд кардиналууд шинэ удирдагчаа сонгоход тав хоног зарцуулсан гэдэг.

Баптисм хүртсэн ямар ч эрэгтэй хүн пап ламаар сонгогдож болно. Сонгогч бүрт саналын хуудас өгдөг. Тэд хүссэн нэрээ оруулаад, хуудсыг нугалж, аяганд хийнэ. Санал хураалт нь нууц боловч  бүлэглэлийн явуулга, лоббид өртөх магадлал өндөр гэж ажиглагчид үздэг байна. Санал хураалт бүрийн дараа саналын хуудсыг шатаадаг. Утааг нь хар эсвэл цагаан болгохын тулд химийн бодис нэмдэг. 60 футын урттай яндангаас хар утаа гарч байгаа нь санал хураалт амжилтгүй болсныг илтгэнэ. Шинэ пап сонгогдсоныг цагаан утаагаар дэлхий нийтэд зарладаг гэнэ.

Сонгогдсон эрхмээс сонгуулийг үр дүнг зөвшөөрөх эсэх, хэрэв тийм бол аль нэрийг өөрийн хамба ламын нэр болгохыг нь асууна. Кардиналууд шинэ пап ламд дуулгавартай байхаа тангараглаж, түүнийг зэргэлдээх өрөөнд оруулан цагаан өмд, ёслолын малгай, улаан шаахай өмсгөдөг. Өөр өөр хэмжээтэй гурван багц хантаазыг Ватиканы оёдолчид урьдчилан урласан байх болно. Кардиналуудын даргалагч өмнө нь мянга мянган католик сүсэгтэн, жуулчид цугларсан Гэгээн Петрийн сүмийн гол тагтан дээр гарч, "Бид пап ламтай болсон" гэж мэдэгддэг байна.

Л.Баяр