Улсын баяр наадам болоход ердөө хоёрхон сарын хугацаа үлджээ. Энэ жилийн наадмаар ямар бөх цолоо ахиулж, ямар хүлэг түрүү магнайд хурдлах бол хэмээн хүн болгоны сэтгэл догдлол дүүрэн байгаа нь гарцаагүй. Тэгвэл бид та бүхэнд 21 болон түүнээс доош насандаа улсын цол хүртэж байсан шилдэг бөхчүүдийг онцолж байна. Ардын хувьсгалаас хойш 14 бөх уг амжилтыг тогтоосон байдаг. 

Дархан аварга Ж.Мөнхбат 

Тэрбээр 1961 онд 21 насандаа шууд Улсын заан болж байжээ. 1960 онд Санхүүгийн Техникумд сурч байхдаа сумын заан болоод л дараа жил нь 60 жилийн ойгоор улсын заан цол хүртэж байжээ. Тэрбээр улсын наадамд 23 удаа шөвгөрсний зургаа нь түрүү, дөрөв нь үзүүр байв. 

Дархан аварга Х.Баянмөнх

Тэрбээр 1963 онд 19 насандаа Улсын начин, Улсын заан цолуудыг авч, 27 насандаа Дархан аварга болжээ. Улсын баяр наадамдаа 27 удаа шөвгөрсний 10 нь түрүү, хоёр нь үзүүр байв. 

Дархан аварга Д.Цэрэнтогтох

Тэрбээр 1972 онд 21 насандаа Улсын начин болжээ. 1981 онд 30 насандаа Дархан аварга болсон. Улсын баяр наадамд 15 удаа шөвгөрсний дөрөв нь түрүү, тав нь үзүүр байв. 

Улсын аварга Д.Хадбаатар

Тэрбээр Д.Цэрэнтогтох аваргатай адтл 1972 онд Улсын начин болжээ. Улсын баяр наадамд 11 удаа шөвгөрсний хоёр нь түрүү, гурав нь үзүүр байв. 

Улсын гарди Д.Баяраа

Тэрбээр 1979 онд 21 насандаа Улсын начин болж байв. 30 насандаа 1988 онд Улсын заан, 2003 онд Улсын гарди цолыг нөхөн хүртжээ. Тэрбээр Улсын баяр наадамд таван удаа шөвгөрсөн. 

Дархан аварга Б.Бат-Эрдэнэ

Тэрбээр 1985 онд 21 насандаа Улсын начин, 1986 онд Улсын заан болжээ. Улсын баяр наадамд 22 удаа шөвгөрсний 11 нь түрүү, нэг нь үзүүр байв. 

Дархан аварга А.Сүхбат

Тэрбээр 1993 онд 21 насандаа Улсын начин болжээ. Зургаан залуу зааны нэг тэрбээр Улсын баяр наадамд 11 удаа шөвгөрсний гурав нь түрүү байв. 

Дархан аварга Г.Өсөхбаяр

Тэрбээр А.Сүхбат 1993 онд 20 насандаа Улсын начин болж байв. Улсын баяр наадамд 13 шөвгөрсний гурав нь түрүү, хоёр нь үзүүр байв. 

Улсын гарди Ц.Цэрэнпунцаг

Тэрбээр 1993 онд 21 насандаа Улсын начин болжээ. Улсын баяр наадамдаа 10 удаа шөвгөрсөн хүчтэн. 

Улсын аварга Д.Сумъяабазар 

Тэрбээр 1994 онд 20 насандаа Улсын начин болсон. Улсын баяр наадамд 14 удаа шөвгөрсний нэг нь түрүү, дөрөв нь үзүүр байна. 

Улсын арслан Х.Мөнхбаатар

Тэрбээр 2001 онд 20 насандаа Улсын начин болж байв. Улсын баяр наадамд 10 удаа шөвгөрсний нэг нь түрүү юм. 

Улсын арслан Э.Оюунболд 

Тэрбээр 2013 онд 20 насандаа Улсын харцага, 22 насандаа Улсын арслан болжээ. Улсын баяр наадамдаа гурван удаа шөвгөрөөд байна. 

Улсын арслан Б.Орхонбаяр 

Тэрбээр 2019 онд 21 насандаа Улсын начин болжээ. Улсын баяр наадамдаа таван удаа шөвгөрсний хоёр нь үзүүр байна. 

Улсын начин Э.Батмагнай 

Тэрбээр 2022 онд 21 насандаа Улсын начин болсон. Тэр цагаас хойш Улсын баяр наадамдаа шөвгөрч амжаагүй байгаа билээ. 

Л.Баяр