“Orange Enterainment & Voo” хамтын бүтээл, түүхэн,  детектив жанрын “Мөрч” ОАУСК хоёр сарын турш үзэгчдийн байлдан дагуулж төгсгөлийн 10 дугаар анги үзэгчдийн хүртээл боллоо.

Уг киноны төгсгөлийн ангийг “Мөрч” ОАУСК-ны үзэгч, фэнүүддээ нэг хоногийн өмнө кино теарт урьдчилан үзүүлсэн бөгөөд энэ үеэр тус киноны найруулагч П.Дэлгэрбаяраас тодрууллаа.

-Мөрч ОАУСК-ны төгсгөлийн анги үзэгчдийн хүртээл боллоо. Бусад олон ангит киноноос онцлог зүйл нь юу байв?

-Мөрч ОАУСК-ны онцлог гэвэл нэгдүгээрт олон ангит, мөн түүхэн цаг үе дээр, гэмт хэргийн, алуурчинг мөрддөг үйл явдалтай кино. Кинонд оролцон тоглосон жүжигчдэдээ сэтгэл хангалуун байгаа. Яагаад гэвэл кино маань харилцан ярианаас үйл явдал, цаашдын байдлууд тодорхой болох ёстой байсан.

Иймээс жүжигчид маань их цээж сайтай, гоё хоолойтой жүжигчин байгаасай гэж бодож сонголтуудаа хийсэн. Орчуулгын киноны, дууны алдартай жүжигчид байгаа. Их ил доль болоогүй үнэтэй үзэгчдийн үзэхийг хүсдэг ховор жүжигчдийг боломжийнхоо хэрээр тоглуулахыг зорьсон.

Миний хувьд 20 жил кино урлагт ажиллаад цөөнгүй кино хийсэн ч гэсэн олон ангит кино дээр төгсгөлийн ангиа том дэлгэц дээр, кино театрт 9 ангиа мөрдөж үзсэн. Хоёр сарын турш үзсэн үзэгчидтэйгээ цуг үзэх сайхан байлаа. Үзэгчдийн маань таавар, сэтгэл одоо амарсан байх гэж бодож байна.

-Төгсгөлийн ангийн дараа үзэгчдэд нэг асуулт үлдлээ. Дараагийн анги гарах уу?

-Кино нэг талаасаа урлаг бүтээж байгаа. Үзэгчдийнхээ таашаалд нийцүүлэх гэж хичээж байгаа болов чиг нөгөө талаасаа кино бол бизнес байдаг.

Тэр үүднээс манай хөрөнгө оруулагч компаниуд ямар шийдвэр гаргахыг яг одоогоор мэдэж байгаа зүйл алга.

Гэхдээ бол өөрийнхөө зүгээс хийгдээсэй билээ гэж хувь хүнийхээ хувьд ч, уран бүтээлчийнхээ хувьд ч бодож байна. Дараагийн анги, цуврал гараад ажиллах боломж гараад явбал их таатай байх болно.

А.Баатар