“Orange Enterainment & Voo” хамтын бүтээл, түүхэн,  детектив жанрын “Мөрч” ОАУСК үзэгчдийн хүртээл боллоо. Уг кинонд “Агь” Хангайн дүрийг бүтээсэн жүжигчин Х.Сумъяадоржтой ярилцлаа.

-“Мөрч” ОАУСК-ны 10 анги үзэгчдийн хүртээл боллоо. Кинонд тоглох саналыг хэрхэн хүлээж авсан вэ?

-Анх тоглох болсон шалтгаан бол би 1910-аад оны үеийн түүхэн кинонд тоглож байгаагүй. Нэгт, он цагийн түүхэн байдал нь таалагдсан. Дээрээс нь Оранж продакшнтайгаа хамт гурав дахь уран бүтээл дээр хамтарч байгаа учраас мэдээж арын баг бол мундаг, ажлаа маш мундаг хийдэг учир тэр тал дээр 100 хувь сэтгэл хангалуун байсан. Тэгээд зохиолоо уншаад Монголдоо анхдагч түүхэн детектив кино гэдэг утгаараа миний анхаарлыг маш татсан учраас тоглох шийдвэрээ гаргасан.

-“Агь” Хангайн дүрийн хувьд?

-Дүрийн хувьд хоржоонтой гэх юм уу, нэг тийм сонирхолтой дүр байна. Хүмүүсийг төөрөгдүүлж болох юм байна гэж бодогдож байсан. Мөн анги болгон дээр яригдаж байх дүр байна гэж бодсон.

-“Мөрч” ОАУСК гарч дууслаа. Төгсгөлийн ангийн дараа үзэгчдэд дараагийн ангиуд гарах уу гэдэг асуулттай үлдлээ. Кино цаашаа үргэжлэх үү?

-Агийг хэн алсан бэ гэх асуулт арван ангийн турш явсан боловч төгсгөлд нь дахиад нэг асуулттай кино маань дуусчихлаа. Дамдин үхсэн үү, үгүй юу гэдэг. Энэ асуултын хариуг дараагийн ангиас үзнэ үү.(инээв)

-Хамтран ажилласан жүжигчдийн талаарх сэтгэгдэл?

-Хамтран тоглосон жүжигчдийн хувьд Монголдоо “А” зэрэглэлийн мундаг жүжигчидтэй хамтарч тоглосон гэдэгтээ 100 хувь сэтгэл хангалуун байгаа. Хамгийн гол дүр болох Н.Ялалт ах маань маш олон жилийн туршлагатай, маш мундаг жүжигчин байгаа.

Хамгийн гоё нь Б.Батмэнд ах, Н.Ялалт ах нартайгаа хамт байх үед ах нараас маш их зүйл сурч авсан. Бид хэд натурт гурван сар хамт байсан. Жүжигчин хүний хувьд дан ганц кинонд тоглохоос гадна арын багтаа яаж хоршин нийлж ажиллах вэ гээд ард их олон зүйл өрнөж байдаг.

Тэр болгон дээр ах нараасаа суралцаж, асууж сураглах зүйл их байлаа. Ах нараасаа их зүйл сурсан. Энэ эрдэм мэдлэгээ дараа дараагийн уран бүтээлдээ ашиглана гэж бодож байна. Ах нар маань ч гэсэн над шиг залуу байхдаа ах нараасаа суралцаад л явж байсан байх. Миний хувьд их олшуурхууштай юм боллоо л гэж бодож байна. 

-“Бид нэг гэр бүл”, “Бүлэг”, “Өв залгамжлагч” зэрэг олон ангит кинонуудад дүр бүтээсэн. Эдгээр олон ангит кинонуудаас “Мөрч” киноны онцлог юу байв?

-Өмнө тоглож байсан кинонуудын хажууд “Мөрч” цаг үеийн байдал нь өөр учир бүх зүйл дагаад өөр болж байгаа юм. Адаглаад хэлэх үг, ярих яриа, ярианы хурд цаг үетэйгээ нийлээд өөр болчихож байгаа нь өөр байсан гэж бодож байна. Олон ангитай кинонуудад тоглож байгаа маань жүжигчин хүний хувьд маш том сургуулалт, сургалтын маш том бааз болдог гэж би хардаг. Олон ангит кино маш урт хугацаанд хийгддэг учир олон сарын хугацаанд байнгын ажилладаг тул гоё санагддаг.

-Кино гарч байх хугацаанд “Ододтой бүжиглэе” шоунд оролцсон. Энэ шоуны талаар?

-Кинотой минь зэрэгцээд “Ододтой бүжиглэе” шоу гарсан нь миний хувьд гоё юм болсон. Шоуны хувьд дэлхийн франчайз шоуг Монголдоо хэрэгжүүлсэн “Монгол HD” телевизийн хамт олонд баярлалаа гэж хэлмээр байна. Энэ шоунд намайг сонгож оролцуулсанд маш их баярлаж байгаа. Энэ шоунаас маш их зүйл сурч авсан. Бүжиг гэдэг зүйл бол маш том ертөнц юм байна лээ. Хүнийг их хүмүүжүүлдэг юм байна. Их юм сурдаг юм байна. Өөрөө өөрийгөө таньж мэддэг юм байна. Миний хувь энэ шоунаас их зүйл авсан. Харамсалтайгаар шоугаа өндөрлүүлсэн байгаа. Өөрийгөө бодсоноосоо хол явсан л гэж өөрийгөө урамшуулаад байгаа. Өмнө нь бүжиг бүжиглэж үзэж байгаагүй. Дандаа л спортоор хичээллэж байсан. Энэ шоуг анх сонгоол, санал ирлээ гээд гэрийнхэндээ хэлсэн чинь гэрийнхэн маань жаахан эргэлзсэн. Аав за яахсын гэж хэлээд. Тэгээд арав хоног СУИС-ын доод курсийн дүүтэйгээ зөвлөлдөөд, за чи ахыгаа хэд хоног бэлдээд өгчих, ах нь өөрөө өөрийгөө танин мэдье гээд. Бэлдээд эхэлсэн чинь болмоор санагдаад. Тэгээд л зориг шулуудаад орсон. Маш гоё шоунд оруулсан бүх хүмүүстээ баярлалаа гэж хэлье. Мөн үлдсэн оролцогчиддоо амжилт хүсье. Та нарыгаа маш их хичээж байсныг харж байсан учир амжилт хүсье гэж хэлмээр байна.

-“Ододтой бүжиглэе” шоунд оролцоод жин хассан уу?

-Жим хийгдгээсээ асар их эрчимтэй жин хаясан. Би 88, 89кг-тай шоуг эхлүүлсэн.

“Мөрч” ОАУСК-ны дараа эхэлсэн. Кинондоо зориулж 82,83 кг-тай байж байгаад жин нэмсэн юм. Яагаад гэхээр түүхэн, Монгол хүн байна дээл хувцсандаа дүүрэн харагдъя гэж бодоод жингээ нэмсэн. Тэгээд 82, 83-аас 88, 89 кг болтлоо масс авчихаад, масстай чигээрээ байж байсан чинь шоуны санал орж ирээд. Тэгээд шоундаа ороод хоёр сарын дотор 8кг-г хаясан.

Нэг дэх өдрөөс бүтэнсайн хүртэл тасралтгүй бүжгээ бэлдээд хөдөлгөөнтэй, өдрийн арав гаруй цагийн бэлтгэл хийсэн. Бүгд л хийж байгаа учир жин хаях нь бат юм билээ. Жингээ хасъя гэж бодож байгаа хүмүүс байвал бүжгийг сонгоорой гэж хэлье. 

-Уран бүтээлийн цаашдын төлөвлөөгөө юу байна вэ?

-Сонирхуулж хэлэхэд “Клеопатра" маань долдугаар сараас дахин тоглогдохоор болж байгаа. Энэ мэдээллийг энэ завшааныг ашиглаад хэлсэн нь зүйтэй байх гэж бодож байна. Жүжиг маань долдугаар сарын 01-ний өдрөөс 10 гаран хоног тоглогдоно. Тодорхой мэдээллүүд нь удахгүй сошиалаар гарна. Одоохондоо жаахан нууц байгаа мэдээлэл гэвэл нэг кино байгаа. Кино бүтээгдэхээсээ өмнө хамаагүй мэдээллээ задруулж болдоггүй. Гэрээ хийдэг учир. Ямар ч байсан түүхэн, томоохон хэмжээний уран сайхны тоглохоор болж байгаа. Томоохон хэмжээний гоё кино болно. Үзэгч та  бүхэн хүлээж байгаарай. Сайхан уран бүтээлээр уулзацгаая.

-Ярилцсанд баярлаа.

-Баярлалаа.

А.Баатар