2025 оны жүдо бөхийн ДАШТ Унгарын нийслэл Будапешт хотноо өнөөдөр эхэллээ. Уг тэмцээн энэ сарын 13-20-ны өдрүүдэд үргэлжилнэ. Тэмцээнд Монгол улсыг төлөөлөн 20 жүдоч оролцож байгаа бөгөөд өнөөдөр хамгийн хөнгөн жингийн барилдаанууд болно. Тодруулбал, өнөөдөр эмэгтэй -48кг жинд Ж.Анударь, Г.Наранцэцэг, эрэгтэй -60кг жинд Э.Ариунболд, К.Ёолк нар зодоглох юм. Тэднийг танилцуулж байна. 

Ганбаатарын Наранцэцэг 

Өдгөө 30 настай тэрбээр Их дуулга ангиллын тэмцээнээс хоёр алт, нэг мөнгө, таван хүрэл медаль хүртэж байжээ. Тэрбээр 2022 оны Анталя, 2024 он Тбилисийн Их Дуулга тэмцээнүүдээс алтан медаль хүртэж байсан. Ази тивийн аваргаас 2022 онд хувийн болон багийн төрөлд хүрэл медаль хүртсэн. Мөн Гранпри тэмцээнээс хоёр хүрэл медальтай. 2015 оны өсвөрийн ДАШТ-ий хүрэлтэй.

Энхтайваны Ариунболд

Өдгөө 29 настай тэрбээр 2022 оны Ташкентын ДАШТ-ээс мөнгөн медаль хүртсэн. 2021 оны Парис, 2025 оны Загрегын Их дуулгаас хүрэл медальтай. 2019 оны Ази Номхон далайн бүсийн АШТ-ээс хүрэл медаль хүртсэн. Олимпын наадамд хоёр удаа оролцож медальт байраас мултарч байлаа. 

Жамсрангийн Анударь

Дөнгөж 18 настай түүнийг -48 кг жингийн найдвар гэлцдэг. Тэрбээр 2024 оны өсвөрийн ДАШТ-ээс мөнгө, 2022 оны ААШТ-ээс алтан медаль хүртсэн. Мөн 2023 оны Азийн цом, 2024 оны Евродын цомын тэмцээнүүдээс гурван алтан медальтай. Хамгийн сүүлд энэ оны Душанбегийн Их дуулгад аваргалаад байна. 

Казирбекийн Ёолк 

Түүний хувьд 24 настай. Одоогоор олон улсын тэмцээнээс медаль хүртээгүй. 2024 оны Токиогийн Их дуулга тэмцээний тав, 2023 оны Улаанбаатарын Их дуулгын долдугаар байрын шагналтай. 

Л.Баяр