Монгол Улсын "Москва-1980" олимпын мөнгөн медальт, МУГТ Жамцын Даваажав агсны нэрэмжит Сонгомол, чөлөөт бөхийн 2026 оны Насанд хүрэгчдийн Улсын аварга шалгаруулах тэмцээн энэ сарын 08-11-ний өдрүүдэд Спортын төв ордонод болсон. Тэгвэл бид уг тэмцээнд зодоглосон бөх аавтай, удамтай хүүхдүүдийг онцолж байна.
Улсын начин Д.Батбаярын хүү Б.Намбардагва
Чөлөөт болон сонгомол бөхиийн Насанд хүрэгчдийн УАШТ-ий хамгийн хүнд буюу хамгийн олны анхаарлын төвд байдаг жин болох 125 кг-ын жинд Баянгол дүүрэг "Аваргууд" академийн бөх, дэлхийн чансааны оноо олгох "Улаанбаатар опен" тэмцээний мөнгө, U20 насны ДАШТ-ий хүрэл, U23 насны Ази тивийн АШТ-ий алтан медальт Батбаярын Намбардагва түрүүлсэн юм.
Өөрөөр хэлбэл тэр хос алтан медальтайгаар тэмцээнээ өндөрлүүлсэн. Саяын тэмцээнд түүний уг амжилтыг адил гаргасан бөх бол Улсын үнэн зоригт харцага, ОУХМ Г.Ганхуяг байв.
Тэрбээр Говь-Алтай аймгийн Бугат сумын харьяат, ЦЕГ Хамгаалалтын газрын бөх Улсын начин Дугардоржийн Батбаярын хүү билээ. Японд Сонгомол бөхийн сургуульд явдаг түүнийг спортын тайлбарлагч С.Шижирбат "Б.Намбардагвыг сонгомолоор ялах_ түүнтэй эн дүйх хүн Монголд одоогоор алга" хэмээсэн юм. Түүний аав Д.Батбаяр нь 1996 онд Сумын заан, 1998 онд Аймгийн заан, 2003 онд Улсын начин цолонд хүрсэн. Бөхийн өргөөнд 10 түрүү, 11 үзүүртэй шилдэг бөх билээ.
Улсын арслан Р.Пүрэвдагвын хүү П.Билгүүндалай
Тэмцээний эрэгтэйчүүдийн 86 кг-ын жинд Алдар спорт хорооны тамирчин Улсын арслан Р.Пүрэвдагвын хүү П.Билгүүндалай хүрэл медаль хүртсэн юм. Түүний хувьд эхний өдөр болсон Сонгомол бөхийн УАШТ-д мөн аваргалсан юм. Ийнхүү тэрбээр чөлөөт, сонгомол төрөлд хоё медальтай болсон байна.
Удамт хүүгийн аав нь Улсын арслан Р.Пүрэвдагва билээ. Тэрбээр 2008 онд Аймгийн арслан, 2010 онд уг цолоо баталсан.
2012, 2014 онуудын Улсын баяр наадамд тав давж Улсын начин цолоо баталсан бол, 2016 оны наадмаар ес даван үзүүрлэж Улсын арслан цолонд хүрсэн билээ.
Улсын харцага М.Дармаабазарын хүү Д.Нарантулга
Үндэсний бөхийн Өсвөрийн УАШТ-ий гурван насны ангилалд тасархай түрүүлж, өнөө жилийн Залуучуудын УАШТ-ий мөнгөн медалийг хүртсэн удамтай нэгэн хүү бол Д.Нарантулга билээ. Тэрбээр хамгийн хүнд 125 кг-ын жинд хүрэл медалийн төлөө барилдаад ялагдсан юм.
Тэрбээр энэ жил АНУ-ын Нью-Йорк хотноо болсон "Journeymen World Classic" тэмцээний 130 кг-ын жинд аваргалсан юм. Өнгөрсөн жил хүрэл медаль хүртсэн тэрбээр өнөө жил ОУХМ, Аймгийн арслан Ч.Алтангэрэлд ялагдан тэмцээнээ өндөрлүүлсэн.
Түүний аав Завхан аймгийн Эрдэнэмандал сумын харьяат Улсын харцага Монхорын Дармаабазар нь 1985 онд Аймгийн арслан 1992 онд Улсын начин, 2004 онд Улсын харцага цолонд хүрсэн. Түүний ах Сумын заан Д.Мөнхтулга нь амжилттай сайн барилдаж Бөхийн өргөөнд улсын аварга, арслангуудыг хаяж байгаа билээ.
Л.Баяр
