Жүдо бөхийн насанд хүрэгчдийн УАШТ маргааш буюу энэ сарын 23-нд Хэнтий аймгийн Чингис хотноо эхлэх гэж буй. Энэхүү тэмцээн нь насанд хүрэгчдийн 49, эмэгтэйчүүдийн 34, холимог багийн 12 дахь удаагийн тэмцээн гэдгээр онцлог бөгөөд 32 клуб, спорт хороодын 320 орчим тамирчин оролцохоор мэдүүлгээ өгөөд байна. Тэгвэл бид та бүхэнд өнгөрсөн 2025 оны Улсын аварга жүдочдийг онцолж байна.
Эмэгтэй
48 кг: Ж.Анударь (Женко)
“Женко” клубийн залуу тамирчин, өсвөр үеийн ДАШТ-ий мөнгөн медальт, Ж.Анударь финалын хүнд барилдаанд жингийнхээ лидер ОУХМ Г.Наранцэцэгийг торгуулиар ялж, улсын аварга цолыг анх удаа хүртсэн билээ. Тэрбээр 2024 оны насанд хүрэгчдийн улсын аваргад Дэлхийн аварга, олимпын мөнгөн медальт Б.Баасанхүүд ялагдаж мөнгөн медаль хүртсэн амжилтаа ийн ахиулсан юм.
52 кг: М.Нандин-Эрдэнэ (Гүрү дожо)
ОУХМ М.Нандин-Эрдэнэ “Алдар”-ын ОУХМ Ц.Гал-Одыг торгуулиар ялж, анхны алтан медалиа зүүснээр медалийн иж бүрэн цуглуулгатай болсон.
57 кг: М.Ичинхорлоо (Алдар)
ОУХМ М.Ичинхорлоо УАШТ-дээ гурав дахь удаагаа түрүүлж буй нь энэ юм. Тэрбээр өмнө нь 2022, 2023 онд аварга болж байсан бол өсвөрийн дэлхийн аварга, Токиогийн Их дуулгын хүрэл медальт, ОУХМ Т.Ариунзаяаг ялсан юм.
63 кг: Л.Энхрийлэн (Сүлд)
ДАШТ-ий хошой хүрэл медальт, МУГТ Л.Энхрийлэн -63 кг руу жин өгсөн барилдаж дахин нэг удаа Улсын аварга болов. Өмнөх жиндээ тэрбээр хоёр удаа аваргалсан.
70 кг: Б.Ням-Эрдэнэ (Женко)
Б.Ням-Эрдэнэ УАШТ-ий хошой алтан медальтан болсон. Аваргын төлөөх барилдаанд өөрийн клубийн тамирчин У.Анужиныг ялсан билээ. Б.Ням-Эрдэнэ 2024 онд аваргалсан амжилтаа ийн баталсан юм.
-78 кг: О.Хүслэн (Сүлд)
Эмэгтэйчүүдийн -78 кг-ын жинд ОУХМ О.Хүслэн Улсын хошой аварга болсон.
+78 кг: А.Адъяасүрэн (Алдар)
"Physical Asia" шоуны од болоод байгаа тэрбээр өнгөрсөн жил түрүүлснээр дөрөв дэх алтан медалиа хүртээд буй.
Эрэгтэй
60 кг: Б.Сүхбат (Женко)
Эрэгтэйчүүдийн хамгийн хөнгөн 60 кг-ын жинд гурав түрүүлсэн амжилтаа “Женко” клубийн тамирчин, ОУХМ Б.Сүхбат өнгөрсөн жил амжилтаа ахиулж, УАШТ-ээс дөрөв дэх алтан медалиа хүртсэн.
66 кг: Ё.Басхүү (Хилчин)
ДАШТ-ий хошой хүрэл медальт МУГТ Ё.Басхүү улсын аваргадаа түрүүлж чадалгүй олон жил явсны эцэст 66 кг-даа итгэл төгс түрүүлсэн. Ингэснээр улсын аваргын нэг алт, гурав хүрэл медальтай болсон байдаг.
73 кг: Б.Эрдэнэбаяр (Хилчин)
МУГТ, Дэлхийн аварга Ц.Цогтбаатарын бэртэлтэй хойгуур уг жинд тодроод буй Б.Эрдэнэбаяр улсын хошой аварга болсон.
81 кг: О.Шинэбаяр (Тэмүүжин)
Тэрбээр УАШТ-дээ анх удаа аваргалж буй нь энэ юм.
90 кг: Ц.Ган-Эрдэнэ (Хилчин)
Тэрбээр өмнө нь улсын аваргаас алт, хүрэл медаль хүртэж байв. Ингэснээр хошой аварга болжээ.
-100 кг: А.Энхбаяр (Алдар)
Эрэгтэйчүүдийн -100 кг-ын жинд “Алдар” спорт хорооны тамирчин А.Энхбаяр улсын аварга цолыг анх удаа хүртсэн. Жингийн шилдэг Б.Гончигсүрэн жин өгссөн нь түүнд энэ боломжийг олгосон билээ.
+100 кг: Б.Гончигсүрэн (Хилчин)
Тэрбээр сүүлийн дөрвөн жил дараалан аваргалсан гэдгээрээ онцлогтой. 2025 онд жин өгсөн +100 кг-ын жинд барилдаж алтан медаль хүртэв. Финалын барилдаанд улсын заан Б.Серикийг цаг дуусах мөчид сугадаж мушгиад хожлын үнэлгээ авсан юм.
Л.Баяр
