Сүүлийн арван жилд Оросын эмэгтэй уран гулгагчид олимпын тайзнаа ноёрхож ирсэн билээ. Сочи 2014-т Аделина Сотникова, Пёнчань 2018-д Алина Загитова, Бээжин 2022-д Анна Щербакова нар алтан медаль хүртэж, Оросын эмэгтэй уран гулгагчдын ноёрхлыг бататгасан. Мөн Юлия Липницкая, Евгения Медведева, Камила Валиева, Александра Трусова зэрэг тамирчид үзэгчдийг гайхшруулж байв. Гэвч Украинд дайн эхэлсний дараа Оросын тамирчдыг олон улсын тэмцээнээс хассан нь олон тамирчдын болон Оросын уран гулгагчдын алтан үеийг тасалдуулсан юм.
Эдгээр тамирчдын ихэнхийг бэлтгэсэн дасгалжуулагч бол нэлээн сөрөг нэр хүндтэй Этери Тутберидзе. Түүний удирдлагын дор Самбо-70 клубээс олон дэлхийн аварга төрсөн ч, хэт хатуу бэлтгэл, боломжит допингийн хэрэглээ, эрүүл мэндэд сөрөг нөлөөтэй арга барилынх нь талаар шүүмжлэл их гарсаар ирсэн. Ялангуяа 2022 оны Олимпийн үеэр Камила Валиевагийн допингийн дуулиан Тутберидзегийн нэр хүндэд хүнд цохилт болсон. Гэсэн ч тэрбээр 2026 он хүртэл шилдэг тамирчдыг бэлтгэсээр байгаа юм.
Өнөөдөр Оросын эмэгтэй уран гулгалтын гол найдвар нь 18 настай Аделия Петросян болоод байна. Москва хотын уугуул тэрбээр 2024, 2025, 2026 оны Оросын аварга шалгаруулах тэмцээнд дараалан түрүүлж, Оросын мөсөн талбайг давамгайлсан амжилт үзүүлжээ. 2025 онд тэрбээр “Төвийг сахисан тамирчин” (AIN) статустайгаар олон улсын тэмцээнд оролцох эрх авч, “Skate to Milano” тэмцээнд түрүүлэн 2026 оны Милан–Кортинагийн Олимпын эрхээ баталгаажуулсан юм.
Милан хотод болох Олимпод Петросян дэлхийн шилдгүүдтэй анх удаа шууд өрсөлдөнө. Түүний гол өрсөлдөгчид нь Японы Каори Сакамото, АНУ-ын Алисса Лью, Эмбер Гленн нар юм. Мэргэжилтнүүд Петросяныг алтан медалийн төлөө өрсөлдөх боломжтой гэж үзэж байгаа ч, олон улсын тэмцээний туршлага багатай Оросын цорын ганц төлөөлөгчийн хувьд түүнд асар их дарамт ирэх нь тодорхой.
Аделия Петросян зөвхөн алтан медалийн төлөө бус, Оросын уран гулгалтын нэр хүндийг дахин сэргээх хариуцлагыг үүрч байна.
