АНУ-ын цанын чөлөөт үзүүлбэрийн олимпын тамирчин Хантер Хесс Ерөнхийлөгч Дональд Трамп түүнийг “жинхэнэ ялагдагч” хэмээн олон нийтийн сүлжээнд шүүмжилсний дараа өөрийн байр сууриа илэрхийллээ. CBS News-д мэдээлснээр, Хесс “Америкт үнэхээр гайхалтай зүйл маш олон бий, гэхдээ илүү сайжруулах ёстой зүйлс ч бас байдаг. Эх орноо хайрлахын зэрэгцээ үүнийг хэлэх эрх, эрх чөлөө бидэнд бий” хэмээн даваа гарагт сошиал хуудсандаа бичжээ.
Тэрбээр “Би эх орноо хайрладаг. Олимпын хамгийн сайхан зүйл бол хүмүүсийг нэгтгэдэгт оршдог. Бид ийм үед илүү нэгдмэл байх хэрэгтэй” гэж онцлоод, ойрын өдрүүдэд АНУ-ын шигшээ багийг төлөөлөн өрсөлдөхдөө баяртай байгаагаа илэрхийлсэн байна. Өнгөрсөн долоо хоногт Хесс сэтгүүлчийн асуултад хариулахдаа АНУ-д өрнөж буй зарим бодлогын талаар “сөрөг бодолтой” байгаагаа хэлсэн нь Трампын хурц хариуг өдөөсөн юм.
АНУ-ын бусад олимпын тамирчид ч энэ сэдвээр өөрсдийн хоолойгоо олон нийтэд өргөлөө. Сноубордчин Беа Ким “АНУ-д олон янзын үзэл бодол зэрэгцэн оршдог нь бидний хүч” гэж хэлсэн бол Мэдди Мастро “Эх орноо төлөөлөхдөө бахархдаг ч гэртээ болж буй үйл явдлууд сэтгэл өвтгөдөг” гэжээ. Харин хоёр удаагийн олимпын аварга Хлои Ким “Цагаачдын гэр бүлээс гаралтай хүний хувьд энэ асуудал надад ойр. Эх орноо хайрлахын зэрэгцээ санал бодлоо илэрхийлэх эрхтэй” хэмээн мэдэгдсэн байна.
Олон улсын олимпын хорооны төлөөлөгч Марк Адамс АНУ-ын ерөнхийлөгчийн мэдэгдлийн талаар тайлбар өгөхөөс татгалзсан бол АНУ-ын Олимп, Паралимпын хороо тамирчдын эсрэг ирж буй заналхийлэл, доромжлолыг хянаж, хууль сахиулах байгууллагад мэдээлж байгаагаа мэдэгджээ. Шинжээчдийн үзэж байгаагаар, спорт ба улс төр салшгүй холбогдож ирсэн бөгөөд өнөө цагт сошиал медиа тамирчдад байр сууриа илэрхийлэх илүү өргөн боломж олгож байна.
Эх сурвалж: CBSNews
