Милан–Кортина 2026 өвлийн олимпын наадамд эрэгтэйчүүдийн 20 км-ийн биатлоны төрөлд хүрэл медаль хүртсэн Норвегийн тамирчин Стурла Холм Лэгрейд ялалтынхаа дараах ярилцлагаар олны анхаарлыг татлаа. Тэбээр спортын амжилтынхаа талаар ярихын оронд хувийн амьдралынхаа хамгийн том алдааг олон нийтэд илчилж, найз бүсгүйгээ хуурч байснаа хүлээн зөвшөөрсөн юм.

Лэгрейдийн хэлснээр тэрбээр гурван сарын өмнө “амьдралынхаа хайр, хамгийн сайхан сэтгэлтэй хүн”-д үнэнч бус хандсан бөгөөд энэ тухайгаа долоо хоногийн өмнө түүнд хэлжээ. Үүний дараа тэд салсан байна. “Би амьдралдаа алтан медальтай байсан ч одоо түүнийгээ алдсан юм шиг санагддаг. Сүүлийн хэдэн өдөр спорт надад хоёрдугаарт тавигдсан,” хэмээн тэр Норвегийн үндэсний телевизэд өгсөн ярилцлагадаа нулимстайгаар ярьсан байна.

Тэрбээр алдаагаа нуухгүй, бүх үнэнийг хэлэх нь өөрийнх нь цорын ганц зам байсан гэж үзэж байгаагаа онцолжээ. “Би бүх үр дагаврыг нь хүлээн зөвшөөрнө. Зүрх сэтгэлээсээ харамсаж байна. Одоо надад алдах зүйл үлдээгүй” хэмээн Лэгрейд хэлсэн байна.

Түүний энэхүү илэн далангүй мэдэгдэл цахим орчинд хурдан тархаж, зарим хүмүүс түүнийг дэмжсэн бол зарим нь олимпын медаль хүртсэнийхээ дараа ийм мэдэгдэл хийх нь зохисгүй гэж шүүмжилжээ.

Энэхүү үйл явдал нь спортын амжилтын цаана тамирчдын хувийн амьдрал, сэтгэлзүйн дарамт ямар их байдгийг харуулсан жишээ болж байна. Лэгрейдийн хувьд энэ ярилцлага нь зөвхөн медалийн тухай бус, алдаа гаргасан хүний чин сэтгэлийн гэмшил, уучлал хүссэн оролдлогын илэрхийлэл болж, олон нийтийн дунд өргөн хэлэлцүүлэг өрнүүлэхэд хүргэлээ.