2026 оны Өвлийн олимп болох Милано-Кортина 2026-ийн уран гулгалтын багийн тэмцээний үеэр АНУ-ын тамирчин Илья Малинин түүхэн амжилт гаргаж, 50 жилийн турш хориглогдож байсан “backflip” буюу арагш эргэх үсрэлтийг олимпын тайзнаа дахин амилууллаа. Тэрбээр эрэгтэйчүүдийн ганцаарчилсан богино үзүүлбэрийн үеэр энэхүү өндөр эрсдэлтэй техникийг амжилттай гүйцэтгэж, 13 мянга гаруй үзэгчдийг алмайруулсан юм.
Backflip нь агаарт босоо тэнхлэгээр эргэдэг энгийн үсрэлтүүдээс ялгаатай бөгөөд биеэ арагш бүрэн эргүүлэх хөдөлгөөн шаарддаг, маш их уян хатан байдал, хүч тэнхээ шаардсан техник юм. Энэхүү хөдөлгөөнийг анх 1976 оны Инсбрукийн олимпод АНУ-ын Терри Кубика гүйцэтгэж байсан ч аюултай гэж үзэн Олон улсын тэшүүрийн холбоо хориглож байжээ. Харин сүүлийн жилүүдэд тамирчдын техник, бэлтгэлийн түвшин өссөнтэй холбоотойгоор уг хоригийг цуцлах шийдвэр гарсан юм.
Backflip нь зөвхөн спортын техник бус, эсэргүүцлийн бэлгэдэл болж байсан түүхтэй. 1998 оны Наганогийн олимпод Францын тамирчин Сурья Бонали энэхүү хөдөлгөөнийг зориуд гүйцэтгэн эсэргүүцлээ илэрхийлж байв. Мөн 2024 оны дэлхийн аваргад Францын Адам Сяо Хим Фа backflip хийж, торгуулсан ч уг техникийг ирээдүйд нэвтрүүлэхэд чухал нөлөө үзүүлсэн. Үүний дараа Олон улсын тэшүүрийн холбоо 2024 онд уг хөдөлгөөнийг албан ёсоор зөвшөөрсөн юм.
Малинин уг үзүүлбэрийн дараа 98 оноо авч, Японы Юма Кагиямагийн (108.67 оноо) ард хоёрдугаар байрт орсон байна. Илья Малинины энэхүү үзүүлбэр нь backflip-ийг “хориотой хөдөлгөөн” бус, орчин үеийн уран гулгалтын нэг хэсэг болгон эргэн авчирч, спортын түүхэнд шинэ хуудас нээсэн үйл явдал боллоо.
