Финландын цанын харайлтын шигшээ багийн дасгалжуулагч Игорь Медвед согтууруулах ундаа хэрэглэсэнтэй холбоотой дуулианы улмаас Милано-Кортина 2026-оос нутаг буцахаар болжээ

Финландын Олимпын хороо түүнийг багийн дотоод журмыг зөрчсөн тул Италиас буцаасан болохыг албан ёсоор баталсан байна.

Финландын Олимпын хорооны спорт хариуцсан захирал Янне Ханнинен:

“Медвед өнөөдөр эх орондоо буцаж ирсэн. Энэ нь согтууруулах ундаатай холбоотой асуудал. Бид дүрэм зөрчлийг маш ноцтойгоор хүлээн авч, шуурхай арга хэмжээ авдаг” гэж мэдэгджээ.

Тэрбээр илүү дэлгэрэнгүй тайлбар өгөхөөс татгалзсан ч Шведийн “Aftonbladet” сонин уг явдлыг “согтуу дуулиан” гэж тодорхойлсон байна.

Ханнинен:

“Одоогийн хамгийн чухал зүйл бол тамирчид болон дасгалжуулагчдын сэтгэл санааны тогтвортой байдлыг хангах явдал” гэжээ.

Үүний зэрэгцээ Финландын Цанын холбооны гүйцэтгэх захирал Марлеена Валтазола Медведийн цаашдын ирээдүйн талаар Олимпын дараа шийдвэр гаргана гэдгийг мэдэгдсэн байна.

Тэрбээр, “Таагүй нөхцөл байдал үүссэн. Дасгалжуулагч багийн дүрмийг зөрчин согтууруулах ундаа хэрэглэсэн. Иймээс бид Медведийг Олимпод оролцуулахгүй байхаар шийдсэн. Бусад асуудлыг дараа нь ярилцана. Одоо хамгийн чухал нь тамирчдын анхаарлыг хамгаалж, багийн уур амьсгалыг сэргээх явдал. Бид чадварлаг бүрэлдэхүүнтэй, нөхцөл байдлыг зөв удирдаж чадна гэдэгт итгэлтэй байна” гэжээ.

2024 оны зургаадугаар сард Финландын багийг удирдаж эхэлсэн Медвед өөрийн үйлдэлд уучлалт гуйжээ. Тэрбээр ажлын бус цагаар согтууруулах ундаа хэрэглэсэн ч багийн тогтсон стандартыг зөрчсөн гэдгээ хүлээн зөвшөөрсөн байна.

“Би алдаа гаргасан, үүндээ маш их харамсаж байна. Финландын шигшээ баг, тамирчид, хөгжөөн дэмжигчдээсээ уучлалт гуйж байна. Баг тамирчдыг Олимподоо төвлөрч, тайван байгаасай гэж хүсэж байна” гэж тэр хэлжээ.