Өвлийн Олимпын кросс-кантри цанын эрэгтэйчүүдийн 10 км-ийн уралдаанд Норвегийн тамирчин Йоханнес Хёсфлот Клэбо гайхалтай ялалт байгуулж, найм дахь алтан медалиа хүртлээ. Ингэснээр тэрбээр Өвлийн Олимпын түүхэн дэх хамгийн олон алтан медальтай тамирчдын нэг болж, домогт Марит Бьёрген, Бьорн Дэли, Уле Эйнар Бьорндален нартай амжилтаараа тэнцэв. 29 настай Клэбо энэ Олимпын гурав дахь алтаа хүртэж байна.

13-ны шөнө болсон энэхүү уралдаан Клэбод аз авчирсан өдөр байв. Тэрбээр өнгөрсөн жил найз бүсгүй Пернилле Дёсвикдээ мөн 13-нд гэрлэх санал тавьж байсан тухай дурсаж, “Надад энэ өдөр азтай санагддаг” хэмээн хэлжээ. Цагтай уралддаг энэ төрөлд өөрийгөө сул талтай гэж үздэг байсан ч Клэбо финалын өгсүүр дээр хүчтэй дайрч, 20 минут 36.2 секундийн амжилтаар барианд орсон юм.

Тэрбээр Францын тамирчин Матис Десложоос 4.9 секундээр, багийн өрсөлдөгч Эйнар Хедегарт-аас 14 секундээр илүү гарч түрүүлжээ. Деслож анхныхаа Олимпод оролцож хоёр дахь мөнгөн медалиа хүртсэн нь Францын багийнхны баяр хөөрийг улам нэмэгдүүлсэн байна.

Уралдаан Итали улсын хойд хэсэгт орших Доломитын нуруугаар хүрээлэгдсэн гайхамшигт байгальд, цэлмэг тэнгэрийн дор болж өнгөрөв.

Клэбогийн энэхүү түүхэн ялалтыг Норвегийн Ерөнхий сайд Йонас Гар Стёре хүртэл олон нийтийн сүлжээгээр дамжуулан баяр хүргэж, “Жинхэнэ хүч чадлын илэрхийлэл боллоо” хэмээн онцолсон байна. Одоогоор гурван уралдаан үлдээд буй Клэбо цаашид дээд амжилтаа шинэчилж, Олимпын хамгийн агуу тамирчин болох боломжоо хадгалсаар байна.

Л.Баяр