Гал морин жилийн Сар шинийн баярт зориулсан хүчит 256 бөхийн барилдааны хоёрын даваа шувтарч, маргааш гурвын даваанд хүч үзэх 64 бөх тодорлоо.
Эхний өдөр улсын цолтнуудаас хоёр аварга, хоёр арслан, нэг гарьд, гурван заан, долоон харцага, 16 начин цолтон унаж, “битүүлгэнд туслах” ажилд шилжлээ.
XXI зууны Цагаан сарын барилдаанд хоёр дархан аварга зодоглосон анхны тохиолдол энэ болов. А.Сүхбат аварга зодог тайлсанаасаа хойш 20 жилийн дараа Бөхийн өргөөнд барилдахдаа хамгийн ахмад бөх нь (54 настай) бол түүнийг давсан залуу бөх А.Энхбаяр энэ барилдааны хамгийн залуу нь (21 настай) байж, тэд 33 насны зөрүүтэй бөхчүүд юм. Ес дэх дархан аваргыг давсан А.Энхбаяр зүгээр ч нэг битүү морь биш.
Жүдогоор өсвөр үеийн Азийн аваргын мөнгө, залуучуудын Азийн аваргын хүрэл медальт, насанд хүрэгчдийн улсын аварга, түүний аав нь аймгийн арслан Т.Алтаншагай, ээж нь гавьяат тамирчин Д.Цэрэнханд юм. А.Энхбаяр өчигдөр тэгшитгэлийн барилдаанд хурц арслан Д.Цэвэлсодномыг давсанаар дархан аваргуудын сэнжиг атгах хувь тохиосон билээ.
Гэвч түүнийг 10 дахь дархан аварга өршөөсөнгүй. Нас залуу, наадам олон доо. Улсын цолтой 67 бөх барилдсанаас одоогоор 36 нь хоёр давсан бөгөөд гавьяат тамирчин цолтой гурав, Бат-Эрдэнэ нэртэй амидаа таван бөх барилдаж байна.
Хоёр давсан хоёр сумын зааны нэг, М.Өсөхбаяр нь 2017 оны Улсын наадмын түрүү, үзүүр бөхчүүд (Ц.Содномдорж, Ө.Бат-Орших)-ийг цувуулан давж, 80-аад оныхонд найр тавьдаггүйгээ дахин батлах шиг. Түүний нөгөөх хоёр давсан сумын заан нь Д.Мөнхтулга, хүчит заан Б.Бат-Өлзий, залуу арслан Б.Орхонбаярыг давсанаар бөхийн таамгийг тэр чигт нь эргүүлж орхив.
Улсын харцага М.Дармаабазар хүү Д.Мөнхтулга “Алдар”-ын арслан, зааныг даан ч нэг дайцтай давлаа. Өнгөрсөн намраас тодроод буй энэ хүү дархан аваргаас бусадтай нь гар зөрүүлээд амжсан, давсан. Маргааш битүүний барилдаан сайхан болох нь ээ. Цахиур хагалах бөх хэн болох вэ, “Ирээдүйн аварга” шагналыг хэн гардах вэ гэдэг асуулт ургаж эхэлнэ. Мартсанаас дархан аварга А.Сүхбатын нэрэмжит “Ирээдүйн аварга” шагнал завсардсан нь валютын өсөлттэй холбоотой юу, Л.Гүндалайгийн начин цолонд ойрхон бөхийн шагнал мөн тасраад буй. Уг нь хүнээ яг олж өгдөг шагнал, авсан хүчтэн нь урам хугалаагүй сайн барилдаж л байна. Н.Батсуурь, Ч.Санжаадамба, Ц.Содномдорж нарыг нэрлэж болно.
А.Сүх
