Олон Улсын Паралимпын Холбоо (ОУПХ) Орос, Беларусийн тамирчдад тавьсан хоригийг цуцалж, тэднийг Милано–Кортина 2026 Паралимпын наадамд улсынхаа төрийн далбаан дор оролцохыг зөвшөөрснөө мэдэгдлээ.

Ингэснээр зургаан орос, дөрвөн беларусь тамирчин улсынхаа нэрийн өмнөөс Паралимпод оролцох боломжтой болсон байна.

Украины паралимпын хорооны ерөнхийлөгч Валерий Сушкевич энэхүү шийдвэрт хүчтэй эсэргүүцэл илэрхийлж, “маш их уурлаж, бухимдаж байна. Гэвч бид Паралимпд оролцох болно. Хэрэв бид оролцохгүй бол энэ нь Владимир Путинд ялалт өгсөнтэй адил болно” хэмээн AFP агентлагт ярьжээ. Өмнө нь Орос, Беларусийн тамирчид зөвхөн “дундын” статустайгаар олон улсын тэмцээнүүдэд оролцох эрхтэй байсан ч Олон Улсын Паралимпын Холбоо өнгөрсөн оны есдүгээр сард шийдвэрээ өөрчилсөн. Мөн тэд спортын арбитрын шүүхэд ялалт байгуулсны дараа улсынхаа нэрийн дор оноо цуглуулах эрхээ сэргээсэн юм.

Энэ удаагийн наадамд оролцох Оросын багт гурван удаагийн олимпын аварга, уулын цанын тамирчин Алексей Бугаев багтжээ. Тэд уулын цана, гүйлтийн цана, сноубордын төрлүүдэд өрсөлдөнө. Харин Беларусийн дөрвөн эрх бүгд гүйлтийн цанад ногдсон байна.

Ийнхүү олон жилийн хоригийн дараа Орос, Беларусийн тамирчид дахин улсынхаа төрийн далбаан дор Паралимпын наадамд оролцох болсон нь олон улсын спортын ертөнцөд маргаан дагуулсан томоохон шийдвэр болоод байна.

А.Сүх