2025 оны Багахангай дүүргийн Баяр наадмыг Ховд аймгийн Ховд дэвжээний болон бусад улсын цолтой бөхчүүд Ховд дэвжээний тэргүүн улсын заан Ч.Батзоригийн хүү болох аймгийн начин Б.Дэнзэнсамбууг аймгийн арслан болгох нэгдсэн зорилготой дайлаар мордсоныг бөх сонирхогч та бүхэн мэдэх билээ.

Б.Дэнзэнсамбуу нь уг наадмын нэгийн даваанд Ховд дэвжээний бөх сумын начин Д.Чинзоригийг, хоёрын даваанд Ховд аймгийн Булган сумын харьяат аймгийн арслан Д.Бадамгаравыг, гурвын даваанд Завхан аймгийн Алдархаан сумын харьяат улсын харцага Л.Лха-Очирыг, дөрвийн даваанд Увс аймгийн Тэс сумын харьяат улсын харцага Т.Баасанхүүг, тавын даваанд Ховд аймгийн Чандмань сумын харьяат өөрийн үеэл ах улсын заан Б.Пүрэвсайханыг, зургаагийн даваанд Ховд аймгийн Мянгад сумын харьяат сумын заан Н.Төмөрхүүг, долоогийн даваа буюу үзүүр түрүүний даваанд Ховд аймгийн Дарви сумын харьяат аймгийн арслан Б.Тайваныг тус тус даван хөлс гаргалгүйгээр баяр наадмын түрүү бөхөөр тодорч аймгийн арслан гэх цолыг хүртсэн. 

Бөх сайн мэдэхгүй хүн уг наадмыг үзсэн бол Б.Дэнзэнсамбууг дараагийн аварга, арслан цол авах бөх байна гэж бодохоор хурдан шаламгай барилдаан хийж улс аймгийн өндөр цолтой бөхчүүдийг давсан билээ. Ийнхүү Ховд аймгийн Чандмань сумын харьяат Б.Дэнзэнсамбуу өөрсдийн гэх бөхгүй, Багахангай дүүргийн наадмыг ийнхүү төвөггүй удирдаж аймгийн арслан болсон ч өдий хүртэл бөхийн өргөөнд авсан цолондоо хүрч барилдаж чадахгүй явна.

Түүний аймгийн арслан цол авснаасаа хойш хийсэн барилдаануудыг шүүж үзэхэд: 

• Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104, Ардчилсан хувьсгалын 35 жилийн ой, Үндэсний их баяр наадмын нэгийн даваанд аймгийн арслан М.Гантулгад

• "Эрдэнэт Хүлэг" морин спорт уяачдын холбооны 30 жилийн ойд зориулсан барилдааны нэгийн даваанд аймгийн начин Б.Бат-Эрдэнэд

• Хан-Уул дүүргийн 60 жилийн ойд зориулсан, Богдхан уулын хишиг барилдааны нэгийн даваанд аймгийн начин Б.Сундуйжавт

• Эх, хүүхдийн эрүүл мэндийн төвийн нэрэмжит хандивын барилдааны хоёрын даваанд аймгийн арслан Х.Балжиннямд 

• Их Монгол Хасын Шаравжамц аваргын мэндэлсний 150 жилийн ойд зориулсан, сар шинийн сорилго барилдааны хоёрын даваанд аймгийн арслан Б.Төмөрбаатарт 

• Дашчойлин хийдийн нэрэмжит, сар шинийн баярт зориулсан, аймаг цэргийн цолтой бөхийн барилдааны нэгийн даваанд аймгийн заан О.Баяржаргалд

• Сүрээр дарагч хэмээх гал морин жилийн сар шинийн баярт зориулсан барилдааны нэгийн даваанд цэргийн арслан Г.Жамбалдоржид

• Булган аймгаас төрөн гарсан аваргуудын нэрэмжит барилдааны нэгийн даваанд аймгийн арслан П.Эрхэмжаргалд

• Эх орончдын өдөр, МАН-ын 105 жилийн ойд зориулсан барилдааны нэгийн даваанд аймгийн начин А.Ширнэндагвад

• Завхан аймгийн Түдэвтэй сумын 100 жилийн ойд зориулсан, тус сумын харьяат, улсын начин Уснихын Балжиннямын нэрэмжит барилдааны нэгийн даваанд улсын начин Г.Ганжадад

тус тус өвдөг шорооджээ. Үүнээс харахад тэрбээр аймгийн арслан цол авсан цагаасаа хойш нийт хоёр удаа л аймгийн начин цолтой бөхчүүдээр бөхийн өргөөнд даваа авч үзсэн бөгөөд, 2025 оны шинэхэн аймгийн арслангуудаас хамгийн муу үзүүлэлт үзүүлж буй нэгэн юм. Бүх сонирхогчид түүний Багахангай дүүргийн Баяр наадмын үеэр хийсэн уран хурц, хурдан шалмаг барилдаануудыг ихэд үгүйлж байгаа тул бэлтгэл сургуулилтаа шамдан хийж формдоо хурдан орохыг хүсье. 

А.Сүх