Монголын үндэсний допингийн эсрэг байгууллагын ажилтан С.Зүчийг тамирчин болон гэрчид нөлөөлсөн гэж Спортын арбитрын шүүхээс үзээд ажиллах эрхийг нь түдгэлзүүлсэн.

Тэрбээр, тамирчныг Б сорьц өгөх эрхээр хангаагүй, гэрчээр дуудагдсан тамирчин руу “Хэрэв чамайг гэрчээр оролцвол жил нэмүүлнэ, шинжилгээн дээр чинь ажиллана” гэх зэргээр сүрдүүлсэн гэж үзсэн учраас түүнийг Монголын үндэсний допингийн эсрэг байгууллагад ажиллахыг спортын шүүхээс түдгэлзүүлээд байсан юм. Өнгөрсөн нэгдүгээр сард ийм шийдвэр гарсан боловч С.Зүчи өнөөг хүртэл ажлаа хийсэн хэвээр байгаа ажээ. Тодруулбал, Монголын үндэсний допингийн эсрэг байгууллага Спортын арбитрын шийдвэрийг үл тоон алдаа гаргасан ажилтнаа хаацайлсаар байна.

Тамирчдынхаа эсрэг ажилладаг, шийдвэр гаргахдаа шударга, ил тод, хараат бусаар ажиллах үндсэн дүрмээ ноцтой зөрчдөг зэрэг нь Спортын арбитраар тогтоогдоод байгаа Монголын үндэсний допингийн эсрэг байгууллага нь уг нь тамирчдыг соён гэгээрүүлэх, допингийн хор уршгийн талаар танин мэдүүлэх, урьдчилан сэргийлэх үүрэгтэй байгууллага. Харамсалтай нь, байгууллага нь ч шийдвэр гаргахдаа хараат бусаар ажиллах дүрмээ умартаж, ажилтан нь ч тамирчин, гэрчүүдэд нөлөөлдөг Монголын үндэсний допингийн эсрэг байгууллагад итгэх итгэл алга болж байна.

Л.Бат