Нийслэлийн хамгийн том спортын арга хэмжээний нэг болох “Улаанбаатар марафон-2026” олон улсын гүйлтийн үеэр оролцогчдын усны хэрэгцээг бүрэн хангах ажлыг АПУ компани хариуцан ажиллаж байна. Энэ жилийн марафонд ерөнхий ивээн тэтгэгчээр ажиллаж буй АПУ компани гүйлтийн зам дагуу зургаан ус түгээх цэг байгуулж, тамирчид болон гүйгчдэд Alkaline брэндийн эрдэсжүүлсэн усаар үйлчилж буй. Тэгэхдээ олон улсын стандартад нийцүүлэн Азийн хөнгөн атлетикиийн холбооны зөвлөмжийн дагуу гүйлтийн замд савласан уснаас гадна аягатай уснуудыг тавьжээ. 

Өнөөдөр болж буй “Улаанбаатар марафон-2026” арга хэмжээ оролцогчдын тоогоороо өмнөх жилүүдийн рекордыг эвдэх төлөвтэй байна. Марафонд нийт 46 мянга гаруй хүн бүртгүүлсэн талаар албан мэдээлэлд дурджээ.

АПУ компани нь “Улаанбаатар марафон-2026”-ын ерөнхий ивээн тэтгэгчээр ажиллахын сацуу спортын хөгжил, идэвхтэй амьдралын хэв маягийг дэмжих зорилгын хүрээнд оролцогчдын аюулгүй, тав тухтай гүйлтийн орчныг бүрдүүлэхэд анхаарч буйгаа онцолжээ.

Марафон гүйлтийн үеэр шингэний зөв хэрэглээ нь тамирчдын тэсвэр, биеийн ачааллыг зохицуулах чухал хүчин зүйлд тооцогддог. Иймээс замын дагуух ус түгээх цэгүүд оролцогчдын хувьд хамгийн чухал дэмжлэгийн нэг болдог.

“Улаанбаатар марафон” нь 2014 оноос хойш жил бүр зохион байгуулагдаж буй бөгөөд иргэдийн эрүүл амьдралын хэв маягийг түгээн дэлгэрүүлэх, олон улсын гүйлтийн соёлыг хөгжүүлэх зорилготой спортын томоохон арга хэмжээний нэг билээ.

Л.Баяр