2026 оны хөлбөмбөгийн дэлхийн аварга шалгаруулах тэмцээн урьд өмнөхөөс илүү олон гоолтой байх нь тодорхой. Учир нь АНУ, Канад, Мексикт зохион байгуулагдаж байгаа 23 дахь удаагийн ДАШТ нь өмнөх тэмцээнүүдээс 40 тоглолтоор илүү байх юм. Харин хамгийн олон гоол оруулж, “ADIDAS Алтан шаахай” хүртэх тоглогч хэн байх вэ? гэдэг асуулт нээлттэй хэвээр байна. Тэгвэл FIFA энэ шагналын гол фаворитуудыг онцолжээ.

1. Harry Kane (Англи)

• Шигшээ баг: 112 тоглолтод 78 гоол

• ДАШТ: 11 тоглолтод 8 гоол

2018 оны ДАШТ-ий мэргэн бууч болсон Кэйн түүхэнд хоёр удаа “Алтан шаахай” хүртсэн анхны тоглогч болох боломжтой. Тэрбээр 2023 онд Bayern Munich-д нэгдсэнээсээ хойш Бундеслигт бараг тоглолт бүрт гоолдож байгаа бөгөөд Жуд Беллингем, Фил Фоден, Букайо Сака зэрэг авьяаслаг тоглогчдоос дамжуулалт авах давуу талтай.

2. Kylian Mbappe (Франц)

• Шигшээ баг: 94 тоглолтод 55 гоол

• ДАШТ: 14 тоглолтод 12 гоол

2022 оны ДАШТ-ий мэргэн бууч Мбаппе дахин түрүүлэх өндөр магадлалтай. Тэрбээр сүүлийн 45 шигшээ тоглолтдоо 38 гоол оруулсан бөгөөд клубийн түвшинд ч тоглолт бүрт шахам гоолдсоор байна.

3. Lionel Messi (Аргентин)

• Шигшээ баг: 196 тоглолтод 115 гоол

• ДАШТ: 26 тоглолтод 13 гоол

39 нас хүрэх гэж буй Месси Аргентины төлөөх сүүлийн 35 тоглолтдоо 34 гоол оруулжээ. Гайхалтай нь тэрбээр ДАШТ-ий аварга болсон ч “Алтан шаахай”-г хараахан хүртэж байгаагүй.

4. Erling Haaland (Норвеги)

• Шигшээ баг: 48 тоглолтод 55 гоол

• ДАШТ: Анх удаа тоглоно

Хааландын үзүүлэлт үнэхээр ер бусын. Тэрбээр олон улсын тавцанд 50 гоолд хамгийн хурдан хүрсэн тоглогчдын нэг болсон бөгөөд хэний ч эсрэг гоол оруулах чадвартай довтлогч гэж үнэлэгдэж байна.

5. Nick Woltemade (Герман)

• Шигшээ баг: 8 тоглолтод 4 гоол

Өндөр нуруу, агаарын тулаанд хүчтэй, техник сайтай энэ залууг Германы дараагийн супер довтлогч гэж нэрлэж эхлээд байна.

6. Cristiano Ronaldo (Португал)

• Шигшээ баг: 226 тоглолтод 143 гоол

• ДАШТ: 22 тоглолтод 8 гоол

Олон улсын хөлбөмбөгийн түүхэн дэх хамгийн олон гоолтой тоглогч 40 нас хүрсэн ч гоолын хурд нь буураагүй. Тэрээр Португалын төлөө сүүлийн 30 тоглолтдоо 25 гоол оруулсан байна.

7. Vinicius Junior (Бразил)

• Шигшээ баг: 45 тоглолтод 8 гоол

• ДАШТ: 4 тоглолтод 1 гоол

Бусад нэр дэвшигчтэй харьцуулахад гоолын статистик бага боловч Real Madrid-ын төлөө улирал бүр 20-иос дээш гоол оруулж байгаа нь түүнийг анхаарал татахуйц өрсөлдөгч болгож байна.

8. Lamine Yamal (Испани)

• Шигшээ баг: 23 тоглолтод 6 гоол

ДАШТ өндөрлөхөд ердөө 19 настай байх Ямал дэлхийн аваргын түүхэн дэх хамгийн залуу “Алтан шаахай” эзэмшигч болж магадгүй.

9. Ousmane Dembele (Франц)

• Шигшээ баг: 57 тоглолтод 7 гоол

Шигшээ багийн статистик нь даруухан боловч клубийн түвшинд довтлогчийн байрлалд тоглож эхэлснээр гоолын машин болсон.

10. Lautaro Martinez (Аргентин)

• Шигшээ баг: 75 тоглолтод 36 гоол

2024 оны Копа Америкагийн мэргэн бууч болсон тэрбээр Аргентины довтолгооны гол хүч хэвээр байгаа бөгөөд Мессигийн дамжуулалтууд түүний боломжийг улам нэмэгдүүлнэ.

Өмнөх ДАШТ-ий мэргэн буучид

• 2014: James Rodriguez – 6 гоол

• 2018: Harry Kane – 6 гоол

• 2022: Kylian Mbappe – 8 гоол

ФИФА-гийн үнэлгээгээр Кэйн, Мбаппе, Месси, Хааланд, Роналду нар ДАШТ-2026-ын “Алтан шаахай”-н төлөөх хамгийн хүчтэй өрсөлдөгчдөөр нэрлэгдэж байна.

Л.Баяр