Хөлбөмбөгийн ДАШТ-ий хэсгийн шатны тоглолтууд үргэлжилж буй энэ үед Японы хөгжөөн дэмжигчид дахин нэг удаа дэлхий нийтийн анхаарлыг татлаа. Тэд Японы шигшээ баг Нидерландын эсрэг хийсэн тоглолтын дараа трибунаа цэвэрлэн, хог хаягдлыг түүж цуглуулсан нь олон улсын хэвлэл мэдээлэл болон нийгмийн сүлжээнд өргөнөөр магтагдаж байна.

Техас мужийн Даллас хотод болсон тоглолт 2:2-оор өндөрлөж, Японы шигшээ баг хожигдож яваад тоог тэнцүүлсэн драма өрнөв. Гэсэн ч тоглолтын дараах хамгийн их яригдсан үйл явдал нь талбай дээр бус, үзэгчдийн суудал дээр болсон юм. Японы хөгжөөн дэмжигчид цэнгэлдэх хүрээлэнгээс яаран гарахын оронд үлдэж, хог хаягдлыг уутанд хийж цэвэрлэсэн байна.

Энэ нь япончуудын хувьд шинэ зүйл биш. Тус улсын хөгжөөн дэмжигчид 1998 оны ДАШТ-ээс хойш ийм соёлыг тогтмол харуулж ирсэн бөгөөд 2018, 2022 оны дэлхийн аваргын тэмцээнүүдийн үеэр ч мөн адил олны талархлыг хүлээж байсан юм.

Олон улсын спортын хэвлэлүүд болон нийгмийн сүлжээний хэрэглэгчид Японы хөгжөөн дэмжигчдийг “дэлхийн хамгийн үлгэр жишээ хөгжөөн дэмжигчид” хэмээн тодорхойлж, тэдний хариуцлагатай, соёлтой үйлдлийг өндрөөр үнэлжээ. Зарим нь энэ үйлдлийг зөвхөн спортын соёл төдийгүй Японы нийгмийн хүмүүжил, бусдыг хүндэтгэх үнэт зүйлстэй холбон тайлбарласан байна.

Судлаачдын үзэж буйгаар, Японд хүүхдүүд бага наснаасаа анги танхим, орчноо өөрсдөө цэвэрлэх дадалтай өсдөг бөгөөд энэ нь нийтийн өмчид хүндэтгэлтэй хандах, бусдад төвөг учруулахгүй байх соёлыг төлөвшүүлдэг ажээ. Иймээс дэлхийн аваргын тэмцээн зэрэг олон мянган хүн цугларсан арга хэмжээний дараа ч япон хөгжөөн дэмжигчид орчноо цэвэрлэхийг хэвийн зүйл гэж үздэг байна.

Японы шигшээ баг Нидерландтай тэнцсэнээр хэсгээс шалгарах боломжоо хадгалсан бол тэдний хөгжөөн дэмжигчид спортын үр дүнгээс үл хамааран дахин нэг удаа дэлхий дахинд үлгэр дуурайл боллоо.

Л.Баяр