Хөлбөмбөгийн ДАШТ-ий хэсгийн шатны тоглолтууд үргэлжилж байна. Өнгөрсөн шөнө болсон гурван тоглолт хөгжөөн дэмжигчдийн анхаарлын төвд байлаа. Өнгөрсөн шөнө Францын шигшээ баг Сенегалыг 3:1-ээр, Норвегийн шигшээ баг Иракийг 4:1-ээр тус тус буулган авч, тэмцээний гараагаа амжилттай эхлүүллээ.

I хэсгийн эхний тоглолтод Францын шигшээ баг Африкийн хүчирхэг төлөөлөгч Сенегалтай учраа таарч 3:1-ээр буулган авлаа. Францчууд тоглолтын эхнээс бөмбөг эзэмшилт болон довтолгооны санаачилгыг гартаа авч, өрсөлдөгчдөө дарамт учруулан довтолгооны шугамд өндөр үр ашигтай тоглосон юм. Сенегал хариу гоол оруулж чадсан ч тоглолтын хувь заяаг эргүүлэхэд хангалтгүй байв. Энэхүү ялалтын ачаар Франц хэсгээ тэргүүлэх өрсөлдөөндөө чухал гурван оноо авч чадлаа.

Мөн I хэсгийн нөгөө тоглолтод Норвегийн шигшээ баг Иракийг 4:1-ийн харьцаатайгаар илүүрхэн хожсон байна. Европын төлөөлөл довтолгооны хурд, биеийн хүчний давуу талаа бүрэн ашиглаж, өрсөлдөгчийн хамгаалалтыг хэд хэдэн удаа сэтэлсэн. Иракчууд нэр төрийн ганц гоолыг оруулсан ч Норвегийн довтолгооны хүчийг зогсоож чадсангүй. Ийнхүү Норвеги Францтай адил гурван оноотой болж, хэсгийн өрсөлдөөнийг улам сонирхолтой болгож байна.

Харин J хэсгийн хамгийн их хүлээлттэй тоглолтод дэлхийн аварга Аргентины шигшээ баг Алжирын эсрэг талбайд гарлаа. Лионел Мессигээр ахлуулсан Аргентинчууд одоогоор Алжирын тун нягт хамгаалалтын эсрэг нэг гоол хийгээд байгаа бөгөөд тоглолтын эхний хагас өндөрлөх дөхөж байна.

Ингэснээр Франц, Норвеги, Аргентин гэсэн фаворитууд эхний тоглолтуудаа ялалтаар эхлүүлж, шөвгийн 32-т шалгарах зорилгынхоо эхний алхмыг хийлээ. Харин Сенегал, Ирак, Алжирын шигшээ багууд дараагийн тоглолтуудад заавал оноо авах шаардлагатай болж байна.

ДАШТ-2026 тэмцээний хэсгийн шат өдөр бүр сонирхолтой өрнөж байгаа бөгөөд өнөөдөр Кристиано Роналдугийн ахалсан Португал болон Английн шигшээ багууд тэмцээний гараагаа эхлүүлэхээр хүлээж байна. 

Л.Баяр