2026 оны хөлбөмбөгийн ДАШТ-д Кабо-Верде улсын шигшээ баг түүхэндээ анх удаа оролцож байгаа нь зөвхөн спортын сэтгэл хөдөлгөм түүхүүдийг бичсээр байна. Тэдний анхны тоглолт Испанийн шигшээ багийн эсрэг болж, 0:0 харьцаатай тэнцсэн нь томоохон сенсаацын нэг болсон. Гэвч энэ тоглолтын гол дүр нь талбай дээрх тоглогчдоос гадна хаалгач Возинья байв.
40 настай туршлагатай хаалгач Возинья Испанийн довтолгооны давалгааг зогсоож, нийт 7 удаагийн шийдвэрлэх хаалт хийснээр багтаа түүхэн оноо авчирсан юм. Түүний тайван байдал, байрлал сонголт, туршлага энэ тоглолтод ялгарч байлаа.
Гэвч энэ гайхалтай тоглолтын ард түүний хамгийн эмзэг түүх нуугдаж байв. Түүний ээж Ана Кандидо Эвора АНУ-д болсон тоглолтыг үзэхээр төлөвлөсөн ч визний хүндрэл болон санхүүгийн асуудлаас болж тэмцээн болох газарт очиж чадаагүй байна. Ингэснээр тэр хүүгийнхээ ДАШТ дэх түүхэн тоглолтыг гэрээсээ телевизээр үзэхээс өөр сонголтгүй болжээ.
Тоглолтын өмнөхөн өгсөн ярилцлагадаа ээж нь “Миний хүү нэг ч бөмбөг хаалганд алдахгүй” хэмээн итгэлтэй хэлсэн нь олон хүний анхаарлыг татаж байсан бөгөөд тоглолтын үр дүн түүний үгийг баталсан мэт санагдав. Тоглолтын дараа Возинья сэтгэл хөдлөлөө барьж дийлэлгүй нулимс унагасан бөгөөд хамгийн том баяр хөөрийнхөө мөчийг ээжтэйгээ хуваалцаж чадаагүйдээ харамсаж байгаагаа хэвлэлд илэрхийлсэн байна. Түүний хэлснээр, ийм чухал өдөр ээж нь хажууд нь байгаагүй нь “хамгийн хүнд мэдрэмжүүдийн нэг” байжээ.
АНУ-ын Төрийн департамент (State Department) түүний ээжийн визний өргөдөл бүрэн бүртгэгдээгүй байсныг шалгаж байгаа бөгөөд холбогдох байгууллагууд асуудлыг тодруулж, шаардлагатай туслалцаа үзүүлэхээр ажиллаж байгаа тухай мэдээлжээ. Тус улсын хувьд энэхүү тэнцээ нь зөвхөн спортын үр дүн бус, дэлхийн аваргын анхны оролцоог нь тэмдэглэсэн түүхэн мөч болж байна. Багийн тоглолт, ялангуяа хаалгачийн үзүүлсэн хамгаалалт олон улсын хэвлэл мэдээллийн анхаарлыг татаж, “ДАШТ-ий хамгийн сэтгэл хөдөлгөм түүхүүдийн нэг” хэмээн онцлогдож буй.
Кабо-Вердийн шигшээ баг дараагийн тоглолтоо Уругвайн эсрэг хийхээр бэлтгэж байгаа бөгөөд тэдний энэ амжилт үргэлжлэх эсэх нь хөлбөмбөг сонирхогчдын анхаарлын төвд хэвээр байна.
Л.Баяр
