Португалын шигшээ багийн хувьд 2026 оны хөлбөмбөгийн дэлхийн аварга шалгаруулах тэмцээн зөвхөн цомын төлөөх өрсөлдөөн биш, Роналдуг сэтгэл дүүрэн үдэх зорилго биш! Тэд өнгөрсөн жил харамсалтайгаар авто ослоор амиа алдсан багийн анд Диого Жотагийнхаа дурсгалыг хүндэтгэн тэмцээнд түрүүлэх зорилготой оролцож буй.
"CNN Sports"-т ярилцлага өгсөн Португалын хагас хамгаалагч Витина “Бид энэ тэмцээнд түрүүлэхийг хүсэж байна. Зөвхөн өөрсдийнхөө төлөө биш, Диогогийн төлөө” хэмээжээ. Түүний хэлснээр, Жотагийн дурсамж багийн хувцас солих өрөө, бэлтгэл, тоглолт бүрийн үеэр хамт байдаг.
Португалын шигшээ баг дэлхийн аваргад тусгай бэлгэдэлтэй ирсэн байна. Тоглогчид бүгд улаан, ногоон өнгийн бугуйвч зүүдэг бөгөөд түүн дээр багийн бүх тоглогчийн нэрийн хамт Жотагийн нэрийг мөн бичжээ. Энэхүү бугуйвчийг Португалын Ерөнхий сайд Луиш Монтенегро бэлэглэсэн бөгөөд тоглогчид ДАШТ-д уг бугуйвчаар гангарахаар тохирсон гэнэ.
Дэлхийн аваргын эхний тоглолтын өмнө Португалын баг Жотагийн дурсгалд зориулсан сэтгэл хөдөлгөм ёслол зохион байгуулжээ. Цэнгэлдэх хүрээлэнгийн том дэлгэцээр түүний зургийг үзүүлэх үед эцэг эх нь үзэгчийн суудлаас нулимс дуслуулан харж байв. Багийн дасгалжуулагч Роберто Мартинез Жотаг багийнхаа 27 дахь тоглогч хэмээсэн.
Жота Португалын шигшээ багийн төлөө 49 тоглолтод оролцож, 14 гоол оруулсан юм. Тэрээр үндэсний шигшээ багтайгаа хамт 2025 оны Үндэстнүүдийн лигийн аварга болж, Испанийг ялсан шигшээ тоглолт нь түүний амьдралын сүүлчийн тоглолт болсон байна.
Португалын баг энэ удаагийн дэлхийн аваргыг хүчирхэг бүрэлдэхүүнтэй угтаж байгаа. Багийг ахалж буй домогт довтлогч Роналду зургаа дахь дэлхийн аваргадаа оролцож байгаа бол Бруно Фернандес, Бернардо Силва, Рубин Диаз зэрэг туршлагатай тоглогчид бүрэлдэхүүнд багтаж байна. Дасгалжуулагч Мартинезын хувьд энэ тэмцээн Португалын алтан үеийн мөрөөдлийг биелүүлэх сүүлчийн боломжуудын нэг байж мэднэ.
Гэвч тэмцээний эхлэл төдийлөн дардан байсангүй. Португал эхний тоглолтдоо БН Конгогийн шигшээтэй 1:1-ээр тэнцсэн бөгөөд багийн цорын ганц гоолыг Жоау Невеш оруулж, гоолын баяраа Жотад зориулан тэмдэглэсэн юм.
Португалчуудын хувьд энэ дэлхийн аварга зөвхөн ялалт байгуулах тухай биш. Харин тэдний хайртай нөхөр, анд, багийн анд байсан Диого Жотагийн дурсгалыг мөнхжүүлж, түүний мөрөөдлийг үргэлжлүүлэх аялал байх нь гарцаагүй. Тиймээс Португалын шигшээ багийн хувьд дэлхийн аваргын цом өргөх мөч нь зөвхөн улсынхаа төдийгүй талийгч Жотагийн дурсгалд өргөх хамгийн том хүндэтгэл байх болно.
Л.Баяр
