2026 оны хөлбөмбөгийн ДАШТ-ий А хэсгийн онцлох тоглолтод талбайн эзэн Мексикийн шигшээ баг Өмнөд Солонгосын шигшээ багийг 1:0-ээр буулган авч, хэсгээс шалгарах том алхам хийлээ. Гуадалахара хотын “Эстадио Акрон” цэнгэлдэхэд болсон энэхүү тоглолт дэлхийн сая сая хөгжөөн дэмжигчдийн анхаарлыг татсан бөгөөд хоёр баг хоёулаа эхний тойрогт ялалт байгуулсан учраас хэсгийг тэргүүлэх чухал тулаан байлаа.

Тоглолтын эхний үе харьцангуй тэнцүүхэн өрнөж, Өмнөд Солонгосын багаас Сон Хөн Мин, Ли Кан Ин тэргүүтэй тоглогчид довтолгооны шугамд аюул учруулахыг хичээсэн бол мексикчүүдээс Рауль Хименес, Хулиан Киньонес нар боломж эрэлхийлж байлаа. Гэвч эхний 45 минутад аль аль баг хаалганы торыг хөдөлгөж чадсангүй.

Харин завсарлагааны дараахан тоглолтын хувь заяаг шийдсэн мөч тохиов. 50 дахь минутад Мексикийн хагас хамгаалагч Луис Ромо торгуулийн талбай дотор үүссэн боломжийг ашиглан гоол оруулж, багтаа тэргүүллийг авчирлаа. Гоол алдсаны дараа Өмнөд Солонгос довтолгоогоо эрчимжүүлж, хариу гоолын эрэлд гарсан ч Мексикийн хаалгач олон гартай мэт л хамгаалав.

Ингэснээр Мексикийн шигшээ баг тэмцээний эхний хоёр тоглолтдоо дараалан ялалт байгуулж, зургаан оноотой боллоо. Тэд өмнө нь Өмнөд Африкийн шигшээг 2:0-ээр хожсон бөгөөд энэ удаагийн ялалт нь хасагдах шатанд шалгарах боломжийг улам баталгаажуулж байна.

Харин Өмнөд Солонгосын баг эхний тойрогт Чехийг 2:1-ээр буулган авсан амжилтаа бататгаж чадсангүй. Тэд одоо хэсгийн сүүлчийн тоглолтдоо Өмнөд Африкийн эсрэг заавал ялалт байгуулах шаардлагатай болж байна.

Л.Баяр